РЦИ-Аланийы Парламенты сæрдар Тускъаты Таймураз кусæг балцы Рахизфарсы районы
Ахуырады райрæзт, бынæттон кондадæн æххуыс æмæ паддзахадон программæты æххæсткæнынад. Парламенты сæрдар Тускъаты Таймураз уыд кусæг балцы Рахизфарсы районы. Æркаст, скъолаты сывæллæттæн цы уавæртæ арæзт ис, уымæ. Бабæрæг кодта стадион «Пищевик» æмæ сывæллæтты райрæзты центр «Альтаир». Социалон-экономикон фарстатыл та æрдзырдтой Парламенты æмбырды. Фарон Беслæны кæронмæ цы ахуырадон уагдæтты арæзтад æрхæццæ, уыдон кусынц æнæ къуылымпытæй. Уый тыххæй Рахизфарсы районы сæргълæууæг Фрайты Сослан фехъусын кодта Парламенты æмбырды. Амыдта йæ Тускъаты Таймураз. Беслæны ныртæккæ аразынц æмæ цалцæг кæнынц скъолатæ, уæлæмхасæн ахуырады уагдæттæ, къæвдайы дон æмбырдгæнæнтæ, 9 фæндаджы. Ноггонд цæуынц районы рынчындон æмæ Сывæллæтты сфæлдыстады хæдзар дæр. Ам фæзындзæн Тагъд медицинон æххуысы дæлстанцæ, базилдзысты Окружная уынджы паркмæ. Национ проектты ахадындзинад Тускъаты Таймураз сбæлвырд кодта йæхæдæг. Сывæллæтты райрæзты центр «Альтаир» аххæссыд 1800-йæ фылдæр скъоладзауыл. Ам архайынц æрыгон техниктæ æмæ бæстæзонджытæ. Ахуыр кæнынц тæхæг аппаратты хуызæгтæ аразын, программæтæ цӕттӕ кӕныныл, æрдзы дуне иртасыныл, зонгæ кæнынц информацион технологитимæ. Роботтæ аразыны къорды та æрæджы сарæзтой æнæ электрон тыхæй кусæг хъармгæнæн. Центрæй уæлдай, ахуыргæнджытæ кусынц районы 10 скъолайы. Цæмæй архайдæн хорз бæрæггæнæнтæ уа, уый тыххæй «Альтаир» бафыста бадзырдтæ уæлдæр ахуырады уагдæттимæ дæр. Афтæ фæсивæд сæхицæн рагацау сбæлвырд кæнынц, цы факультетмæ бацæудзысты ахуыр кӕнынмӕ, уый. Дарддæр — сывæллæтты 13-æм рæвдауæндон. Ног бæстыхайы сабиты райрæзтæн бирæ гæнæнтæ ис, æппынæдзух цæуынц бассейнмæ, семæ кусы логопед, физкультурæйæ инструктор. Экологон хъомылады ахуырты та рудзынгыл æрзайын кодтой нуры, хъæдындз, мæнæу. Парламенты сæрдар æхсызгонæй аныхас кодта 1-æм сабидоны хъомылгæнинæгтимæ дæр. Дарддæр программæйы — 2-æм скъола, йæ ахуыргæнинæгты нымæц у 566. Æртæуæладзыгон бæстыхайы ис интерактивон фæйнæджытæ, 3D-принтертæ, микроскоптæ. Алы ахуыргæнæн дӕр йӕ ахуырадон агъуыст нырыккон домæнтæн дзуапп дæтты. Уымæй уæлдай, ам ис сфæлдыстадон æрмадзтæ, "Рæзты тæлм", цалдæр спортивон фæзы æмæ кадетон кълæстæ. Куыстуат «Карагро»-йы кӕнынц халсартӕ ӕмӕ дыргъты консервацийы куыст. Амалхъомтæ сæ продукци ауæй кæныны хъуыддаджы зындзинæдтимæ никуы сæмбæлынц, адæм æй кæддæриддæр дуканиты тæрхæджытыл агурынц. Дарддæр Тускъаты Таймураз бабæрæг кодта Бруты амбулатори. Дохтыртæ лæггад кæнынц 1302 цæрæгæн, бынаты ис боныгон стационар. Закъонæвæрæг органы разамонæг радзырдта медицинæйы ног гæнæнты тыххæй. Стадион «Пищевик» æгас Рахизфарсы районæн дæр зонгæ у. Ардыгæй иу æмæ дыууæ зындгонд футболисты нæ рацыд, фæлæ бирæ азты дæргъы цалцæггонд нæ уыд. Объект сног кæныныл кусын райдыдтой 2022-æм азы мартъийы. Ныр стадионы дыууæ фæзы ис, иу — уынджы, иннæ — мидæгæй, ӕмӕ дзы хъазæн ис сæрдæй-зымæгæй. Егъау проект арæзт у 2000 адæймагæн. Парламенты сæрдар ма йæ раныхасы фæбæрæг кодта, кусæг балцы рæстæг закъонæвæрынады хъуыддаджы бирæ къахдзæфтæ нысангонд кæй æрцыд, уый. Сæйраг нысан — пайдаджын экономикон архайдмæ фæкæсын.