Коммуналон службæтæ ма æвзæр боныхъæды фæстиуджытæ иуварс кæнынц Дзæуджыхъæуы дæр. Тæрккъæвдаты аххосæй горæты  афæлдæхтысты цыппар бæласы. Горæты сæйраг парчы цы бæлæстæ баййæфтой хъыгдæрд, уыдон æрæджы банымадтой, акалын кæй хъæуы, ахæмтыл. Хъуамæ куыстытæ баххæст кодтаиккой 1-æм июны, фæлæ бæрæгбоны тыххæй мадзæлттæ аргъæвтой бон фæстæдæрмæ. Горæты администрацийы аивгæнæн æмæ цъæхгæнæн куыстыты сæйраг специалист Хекъилаты Магомеды ныхӕстӕм гӕсгӕ, абон бæлæстæ лыг кæныны æмæ ласыны куыстмæ бавнæлдтой райсомæй. Ныридæгæн объекты архайынц техникæйы 7 иуæджы æмæ 15 кусæджы.