Сабибонтæй фæстæмæ ацы бæрæгбон у уарзон

Ног азмæ ма цалдæр сахаты баззад. Уырымты дуармæ цы митын лæгтæ бадынц, уыдон дæр æм, æгас дунеимæ иумæ, æнхъæлмæ кæсынц. Мидæгæй къæбицы кæстæр сылгоймæгтæ фынгтæ цæттæ кæнынц, хæдзары хистæрты дæр а ныр а уæд ардæм хъæуы. Ног аз нæ алкæмæндæр сабибонтæй фæстæмæ у уарзон. Уæд-иу цыма Митын Дада дæр рæдаудæр уыд. Фыстæг æм ныффысс, заз бæласы бын æй бамбæхс æмæ дын дæ лæвар бæрæгбонмæ, æнæмæнг, æрбахæццæ кæндзæн.  Бæрæгбон æрбахæццæ кæны, йемæ къæсæрыл æнæнхъæлæджы уазджыты дæр æрбалæууын кæны, æмæ сыл ацы алæмæты æхсæв бинонтæ зæрдиагæй бацин кæнынц. Айлартæ ныр дæс азы дæргъы иу Ног азыл дæр афтæ нæ сæмбæлдысты, æмæ сæ уарзон адæмæн арфæтæ ма ракæной. Сæ хæдтулгæ лæвæрттæ æмæ хъæлдзæг равгæй байдзаг кæнынц æмæ сæ рæдауæй байуарынц. Æмæ мæнæ аргъауы хъайтартæ Уырымты кулдуарæй æрбакъахдзæф кодтой. Кæрт уайтагъд фæндырдзагъд æмæ зарæджы зæлтæй айдзаг. Уазæг – Хуыцауы уазæг! Бинонтæ сæ куы ауыдтой, уæд хистæрæй-кæстæрæй сæ зæрдæтæ хурварс абадтысты. Митын Дада сабиты уайтагъд лæвæрттæй æрмыдзаг бакодта. Кæрæдзийæн сæ æвдисынц. Уæдæ кæй басыл хæмпусдæр, кæй къафет адджындæр у, зæгъгæ. Сабийы мидбылхудтæн бирæ хъæуы? Уæдмæ фысымтæ æмæ уазджытæ симды бацыдысты. Æцæг хъазт сарæзтой. Симд æмæ хонгæ ивтой зилгæ æмæ гогызы кафтӕй. Дæс азмæ, кæй зæгъын æй хъæуы, Светланæйæн йæ цоты хистæртæ сæ амонд ссардтой. Фæлæ сæм ацы бон æнхъæлмæ кæсдзысты, уый фæзонынц, æмæ иумæ æрбамбырд вæййынц. Абон сæ гыццыл сабитæ дæр ам сты, Митын лæг æмæ Митæйы фæлгонцты. Ацы хъæлдзæг фæтк сæм куыд ныффидар, уый нын радзырдтой. Алы аз дæр Айлартæ бацæттæ кæнынц ног зарджытæ, ныхæстæ сын ныффыссынц сæхæдæг. Уæдæ сæ уæлæдарæс дæр сног кæнынц. Уæдæ Ног аз нæ къæсæрыл æрбалæууыд, æмæ йæ Стыр Хуыцау амондджын уазæг фæкæнæд!