Беслæны кусы, йæ архайд æмæ ифтонгадæй æппæт нырыккон домæнтæн дзуапп чи дæтты, ахæм чиныгдон

Рагон чингуытæ ссарын, историйы цаутыл афæлгæсын, алæмæты бæстæмæ бахауын фенцондæр ног гæнæнты руаджы. Модельная библиотекæ кæй хонынц, уый фæзынд Беслæны. Къухы бафтыд национ проект «Культура»-йы руаджы. Нырыккон технологиты руаджы республикæйы цæрджытæн фадат фæзынд националон электронон чиныгдоны фондæй пайда кæнын. Уырдæм бахастой 4,5 милуан алыхуызон фæрæзы. Уымæй уæлдай ма ахуырадон фæзтыл арæзт цæуынц дæсныйадæвдисæг ахуыртæ, литературон изæртæ. Ацы агъуысты æнцад ничи фæбады. Цымыдисаг чиныг зæххы къорийы тыххæй, алæмæты бæстæйы фæдыл цаутæ, науæд та програмированийы сайттæ æмæ информацийæ раст пайда кæныны фæдыл æрмæджытæ. Беслæны чиныгдоны фидарæй зонынц чиныг зонындзинæдты къæбиц кæй у, уый. Фæлæ компьютеры руаджы та ссарæн ис алыхуызон информаци. Уыимæ ма тагъд æмæ бынаты. Сæйрагдæр у гарзæй раст пайда кæнын. Ам ууыл ахуыр кæнынц фæсивæды. Библиотекæмæ чи æрбацæуы, уыдонæн сæ бон вæййы лæвар интернетæй пайда кæнын. Залтæ афтид никуы вæййынц. Беслæны чиныгдоны ис материалон-информацион гæнæнтæ. Цыппар азы размæ йæ сног кодтой национ проект «Культура»-йы фæлгæты. Самал сын кодтой нырыккон кусæнгæрзтæ. Æмбæлгæ уавæртæ дзы сарæзтой йе 'нæниздзинад хъыгдæрд кæмæн у, ахæм адæмæн дæр. Чиныгдоны фонды ис мыхуыры фæрæзты 43 000 экземпляры. Апарахат сты цалдæр залыл, уыимæ ма тематикон фæзтæ дæр. Арæх дзы ацæуы алыхуызон мадзæлттæ, акцитæ, равдыстытæ. Чиныгдоны кусджытæ сæ архайды бæрггæнæнтæн аргъ кæнынц. Æрыгон адæмы æргом чиныгмæ здахынц æмæ сын уый у æхсызгон. Фонд æппынæдзух фылдæрæй фылдæр кæнынц кæсджыты домæнтæм гæсгæ. Зæгъæм, ацы аз самал кодтой бæстæзонадон литературæ. Уыимæ ма архайынц фылдæр мадзæлттæ саразыныл. Сæ сæйраг нысаныл нымайынц чиныгдоны кад бахъахъхъæнын, уыимæ ма рæстæджы домæнтæн дзуапп дæттын.