Æвзæр боныхъæд цы районтæ бахъыгдæрдта, уыдоны дарддæр цæуынц фæстиуджытæ иуварсгæнæн куыстытæ. Дысон тыхджын къæвдайы аххосæй уыцы иу рæстæг цалдæр районы баззадысты æнæ электрон тыхæй. Россетийы радхæссæг къордтæ куыстой æхсæвы дæргъы. Ныртæккæ æрдздыхы фæстиуджытæ иуварс кæнынц Дзæуджыхъæуы, Джызæл, Кæрдзын, Заводы æмæ Южный поселокты. Æдæппæтæй 50 специалисты, стæй техникæйы 20 иуæджы. Фæндагон кусджытæ архайынц Æрыдонæй Дигорамæ цæуæг фæндаг сцалцæг кæныныл. Знон æй, æдасдзинады домæнтæм гæсгæ, сæхгæдтой. Дзæуджыхъæуы коммуналон службæтæ дæр кусынц сæрмагонд фæткмæ гæсгæ - 100 специалисты æмæ техникæйы 25 иуæджы. Дымгæ цы бæлæстæ афæлдæхта, уыдон горæты уынгтæй ныридæгæн айстой. Сног кодтой, цы телтæ атыдтой, уыдон дæр. Сыгъдæг æмæ ма цалцæг кæнынц дзондзæуæнтæ. Æдæппæтæй Дзæуджыхъæуы сты 3 минæй фылдæр. Уæдæ синоптиктæ дæр хæстæгдæр цалдæр боны хорз боныхъæдæй зæрдæ не 'вæрынц. Тæрккъæвдатæ аххæсдзысты 19 июны онг.