Хæххон паддзахадон аграрон университеты уыд адæмон кафджыты къордты фестиваль

Цæгат Кавказы Федералон зылды уæлдæр ахуыргæнæндæтты адæмон кæфтыты къордты минæвæрттæ абон сты Дзæуджыхъæуы. Цæгат Ирыстонмæ саккаг кодтой ансамбль «Горец»-ы аивадон разамонæг, нæ республикæйы адæмон артист Æлборты Юрийы хъæппæрисæй. Цы стыр фестиваль сарæзтой, уый амидингæнджытæ сты Хæххон Паддзахадон аграрон университет æмæ Фæсивæды хъуыддæгты федералон агентад. Абон Цæгат Ирыстоны паддзахадон аграрон университет æрбамбырд кодта Цæгат Кавказы Федералон зылды хъæууон-хæдзарадон ахуыргæнæндæтты адæмон кафджыты ансамбльтæ. Уыдон сты Дагестан æмæ Кæсæг-Балхъары республикæты минæвæрттæ. Кафджыты къордтæ æрбацыдысты, цæмæй æгасцуай зæгъой Цæгат Ирыстоны аивадуарзджытæн. Габысаты Алан, РЦИ-Аланийы Паддзахадон аграрон университеты ректоры æххуысгæнæг: «Уæрæсейы хъæууон-хæдзарадон уæлдæр ахуыргæнæндæтты ис адæмон ансамбльтæ. Нæ республикæйы аграрон паддзахадон университеты разамынд æмæ ансамбль «Горец»-ы разамонæг Æлборты Юрийы бафæндыд Ирыстоны ахæм фестиваль саразын. Стыр æххуыс нын бакодта Фæсивæды хъуыддæгты федералон агентад. Сæ хъæппæписæй нæ фæнд нæ къухты бафтыд». Ацы фестиваль бацæттæ кодтой Цæгат Ирыстоны паддзахадон аграрон университеты æмæ фæсивæды хъуыддæгты федералон агентад. Зæрдиагæй сæм саккаг кодтой кадджын уазджытæ дæр. Уыдоны 'хсæн: Уæрæсейы адæмон артист, Махмуд Эсамбаевы номыл аивæдты скъолайы директор Доку Мальцагов. Уæрæсейы «Артиадæйы» лауреат, Кæсæг-Балхъары паддзахадон агарарон университеты ансамбль «Синды»-йы аивадон разамонæг Руслан Борсов æмæ Дагестаны адæмон артисткæ Галина Курбанова æмæ иннæтæ. Кафты фæрцы раргом вæййы адæймаджы миддуне, уыимæ ма аивадуарзджытæн сæ зæрдæтæ барухс вæййынц кафæджы рæсугъд æмæ аив бакастæй. Афтæ хъуыды кæны Дагестаны паддзахадон аграрон университеты культурон центры разамонæг. Азизова Зульфия, Дагестаны паддзахадон аграрон университеты культурон центры разамонæг: «Ацы фестивальмæ мах рагæй æнхъæлмæ кастыстæм. Æлборты Юрий нын æй куы загъта, уæд нæхи бæстонæй цæттæ кæнын райдыдтам. Махæн тынг æхсызгон у, ацы фестивалы кæй архайæм, уый». Ацы фестиваль нæ республикæйы арæзт æрцыд фыццаг хатт. Уыимæ ма ахæм сценæйы абон бацархайдтой чысыл сабитæ дæр. Уыдон та саккаг кодтой Налцыккæй. Куготов Ратмир, налцыккы ансамбль «Синды»-йы кафæг: «Мах æнцад нæ лæууыдыстæм. Суанг ма - иу изæры дæр цæттæ кодтам нæхи. Бафæлладыстæм, фæлæ уый тыххæй нæ тыхсæм. Фæндыдис нæ ардæм тагъддæр æрбацæуын». Фестивалы сæйраг нысан у, цæмæй адæмон кафджыты ансамбльты минæвæрттæ кæрæдзийымæ зонгæ кæной. Уыимæ ма саразой хæстæг ахастдзинæдтæ Кавказы республикæтимæ дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv