Хуссар Ирыстоны сарæзтой фæсивæдон форум

Хуссар Ирыстоны цæуы фæсивæдон форум. Йæ архайджытæ уал бабæрæг кодтой республикæйы Национ музей. Сæ хиирхæфсæн пълан тынг хъæздыг у. Уазджытæ фендзысты Хуссар Иры аивдæр бынæттæ, фембæлдзысты, республикæйæн кад чи кæны, уыцы адæмимæ. Сæрмагонд балц сын форум амидингæнджытæ сарæзтой Знауыры районмæ. Форумы архайджытæ цы федтой, цы базыдтой æмæ сæ зæрдæмæ цы фæцыд Хуссар Ирыстоны, уый базондзыстут нæ дарддæры æрмæгæй. Национ музейы кусджытæ сæхиуыл нæ бацауæрстой, цæмæй уазджытæ Хуссар Ирыстоны ивгъуыд æмæ абонимæ бæстонæй базонгæ уой. Алы экспонатæн дæр дзы ис йæхи истори æмæ баст у фыдæлтыккон цардывæтк æмæ æгъдæуттимæ. Зæгъæм, музейы бахизæны фенæн ис Тугъанты Махарбеджы конд нывтæ. Раст сæ цыма ирон цард ахъардта, афтæ сты иууылдæр. Уазджыты зæрдæмæ дæр фæцыдысты. Дисы сæ бафтыдтой нæ адæмы `гъдæуттæ æмæ лæмбынæгæй хъуыстой дзурæджы ныхæстæм. Андрей Джоджуа Хуссар Ирыстонмæ ссыд Абхазийæ. Цыма йæ хæдзарæй никуыдæм ацыд, афтæ йæм кæсы. Абхазийы фæсивæдон политикæйы паддзахадон комитеты сæйраг специалист Андрей Джоджуа: «Нæ фысымтæ тынг уазæгуарзон сты, тынг хорз сарæзтой ацы форум. Тынг бузныг сæ фестæм. Ныртæккæ, зæгъæм, стæм Национ музейы. Раст зæгъгæйæ, истори æмæ `гъдæуттæй æз уыйас дисы нæ бацыдтæн, мæхæдæг Абхазийы цæрæг кæ дæн, æвæццæгæн, уый тыххæй. Дис æндæр хъуыддæгтыл фæкодтон. Кæрæдзимæ афтæ хæстæг сты нæ адæмтæ, æмæ йын зæгъæн дæр нæй. Дæрддзæг не `хсæн бирæ ис, фæлæ нæ зæрдæтæ та – фæрсæй-фæрстæм. Не `гъдæуттæ дæр уымæн æмхуызон сты. Æнæмæнгæй мæ уырны, фидæны дæр афтæ кæй уыдзæн æмæ не `нгомдзинад бонæй-бонмæ фидардæр кæй кæндзæн». Уыйфæстæ уазджытæ араст сты Знауыры нывтæм кæсынмæ. Уацары сæ райстой. Уæлдай тынг кадджын сæ цæсты уыдысты Мадымайрæмы аргъуан æмæ Дзагъинайы мæсгуытæ. Приднестровьейы цæрæг Алёна Страхова: «Æз дæн Приднестровьейы цæрæг. Ахæм рæсугъд бынæттæ никуыма федтон. Тынг мæ зæрдæмæ фæцыдысты. Уæдæ адæм та хицæн ныхасы аккаг сты. Æз ахæм æргом зæрдæты хицæуттыл никуыма сæмбæлдтæн. Исты бахъæуæд уазæджы, æмæ дын æй зæххы бынæй дæр сласдзысты. Æхсызгон нын у, ардæм кæй сæмбæлдыстæм, уый. Нæ зæрдæйы цас рæсугъд æнкъарæнтæ аласдзыстæм, уый куы зониккат. Алкæмæн дæр æй радзурдзыстæм». Донецкæй чи ссыд, уыдоны `нкъарæнтæ дæр – ахæм. Виктор Орехов, Донецкы республикæйы фæсивæдон политикæ, спорт æмæ туризмы фæдыл министры хæдивæг: «Æнæмæнг, æрдз! Æмбал ын нæй! Адæм та – бынтон диссаг! Хуыцау зæгъæд, æмæ ацы алæмæты дуне сабыр куыд уа. Хæстæн дзы йæ кой дæр мауал уæд! Махæй хуыздæр ма чи хъуамæ `мбара уый?! Фæнды мæ, йæ къабаз, йæ хион хæсты кæмæн фæмард, уыдонæн тæфæрфæс ракæнын. Макуыуал фенæнт ахæм зындзинад, уæ республикæ та фидар уæд!» Форумы архайджытæм ма `нхъæлмæ кæсы цымыдисаг программæ. Уыдзысты ма куыд официалон, афтæ хиирхæфсæн мадзæлтты. Уæдæ сын фысымтæ цæттæ кæнынц культурон равдыст дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv