Бантыст сын

Цæгатирыстойнаг спортсментæ архайдтой Уæрæсейы ерысты джиу-джитсуйæ. Ерыстæ цыдысты Санкт-Петербурджы 8-æй -10 февралы онг. Мæхъиты Кристинæ æмæ Хъараты Таймураз уæлахиздзаутæ систы алыхуызы уæзты. Уыимæ ма, не `мзæххонтæ рамбылдтой æвзист æмæ бронзæ майдантæ. Цæгат Ирыстоны джиу-джитсуйы федераци фæзынд æрмæст 10 азы размæ. Уыцы цыбыр рæстæгмæ ацы спорты хуызæй архайджытæ хорз бæрæггæнæнтæ равдыстой. Мæхъиты Кристинæ ацы спорты хуызæй архайы 13 азы. Бирæ æнтыстдзинæдтæ бафтыд йæ къухы. Уæрæсейы æрыгæтты 'хсæн ерысты бацахста фыццаг бынат. Уый фæстæ та архайдта Европæйы æмæ дунейы ерысты. Ныртæккæ 21 аздзыд спортсменкæ архайы хистæртимæ. Æрæджы Уæрæсейы ерысты радон хатт сси æппæты хуыздæр æмæ рамбылдта сызгъæрин майдан. Нæ республикæйы джиу-джитсуйы историйы уый у æртыккаг сызгъæрин майдан. «Тынг зын мын уыд, уымæн æмæ мæ ныхмæлæуджытæ фæлтæрдджын уыдысты. Фыццаг мæ тыхтæ бавзæрстон Алла ПадЕринаимæ. Уый сгуыхт тренер у. Дунейы æппæты хуыздæр сси. Финалы та фембæлдтæн Воронежæй спортсменкæимæ», - Уæрæсейы чемпионкæ джиу-джитсуйæ Мæхъиты Кристинæ. Джиу-джитсуйæ ерыстæ уыдысты Санкт-Петербурджы. Архайдтой дзы 900 спортсмены. Цæгатирыстойнæгтæ дзы уыдысты 11. Уыдонæй 6 сæхи æнтыстджынæй равдыстой. Æппæты хуыздæрыл та банымадтой Хъараты Таймуразы. Спортсмен 4 хатты фæуæлахиз æмæ рамбылдта сызгъæрин майдан. «6 ныхмæлæууæгимæ тох кодтон. Æрдæгфинал уыд æппæты зындæр. Мæскуыйаг спортсмен тынг арæхстджын уыд. Уый фæстæ та финалы фембæлдтæн Екатеринбургæй спортсменимæ. Уыимæ ма дунейы ерысты дæр архайдтам. 15 азы онг лæппуты 'хсæн ерысты мæ уæд рамбылдта. Ныр та æз фæтыхджындæр дæн», - Уæрæсейы ерысты уæлахиздзау джиу-джитсуйæ Хъараты Таймураз. Иугонд командæйы тренер, Дзитойты Артур йæ хъомылгæнинæгты æнтысдзинæдтæй разы у. Йæ ныхæстæм гæсгæ, фæстаг æртæ къуырийы сæхи уæлдай зæрдиагæй цæттæ кодтой. Лæппуты арæхстдзинад бонæй-бонмæ уæлдæр кæны, сæ уæлахизтæ та- фылдæрæй-фылдæр. Ноябры Абу-Дабийы сараздзысты дунейы ерыстæ. Ныртæккæ спортсментæ сæхи уыцы ерыстæм цæттæ кæнынц стадион "Динамо"-йы. Тренертæ æрвылбон архайынц лæппуты арæхстдзинад фæхуыздæр кæныныл. Ныфс сæм ис ацы спорты хуызы истори нæ республикæйы хъæздыгдæр кæй кæндзæн, ууыл. Ацы аз сæххæст 25 азы, нæ республикæйы джиу-джитсу кæдæй фæзынд, ууыл Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv