Мæздæджы районы пъæлицæйæгтæ æрцахстой æргом давæджы

Мæздæджы районы пъæлицæйæгтæ йæ тæккæ фæд-фæд баурæдтой давæджы. Фыдракæнд æрцыдис уынджы. Барады кусджытæм чи бакъул кодта йæхи æххуысмæ, бæлвырд та йæ уый радзырдта. Цæвиттон, изæры бамбæлд, хиирхæфсæн ранæй чи рацыд, ахæм лæппуты къордыл. Иу дзы йæхи æрыгон нæлгоймагмæ байста æмæ дзы бадомдта æхца. Йæ ныхас кæронмæ нæма фæцис, афтæ ма йæ сæрмæ æндæр хъуыды дæр ныццавта. Фыдгæнæг лæппуйы хъуырмæ фемдзаст, ауыдта йыл æвзист лыстæг рæхыс æмæ йын æй ратыдта. Йе `хца дæр ын уæдæ йæхирдыгæй фæкодта. Хъыгдард баййафæг лæппу айтæ-уйтæ нал акодта, фæлæ уайтагъд пъæлицæмæ фæхабар кодта. Уыдон бынатмæ æвæстиатæй сæмбæлдысты фыдгæнæнджы ссарыны хæсимæ. Бамбæлдысты йыл Мæздæджы районтæй иуы æмæ йын йæ рохтыл æрхæцыдысты. Уый уæдмæ æхца фæкъуыввитт кодта спортивон букмекерты къанторы. Йæ ныхмæ йын ныр байгом кодтой уголовон хъуыддаг. Слестгæнæн куыстытæ дарддæр цæуынц. Кæй исбон фæкодта йæхирдыгæй, уыцы нæлгоймаг та пъæлицæйæгтæй галы бузныг фæцис. Куыд рабæрæг, афтæмæй сæ ныр хъуамæ исты хæрзиуджыты аккаг скæной. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv