Бархионты архайды рæзты фарстаты фæдыл советы æмбырд

500 адæймагæй фылдæр медицинон тагъдæххуыс ракæныны тыххæй сæрмагонд ахуыртæ ацæудзысты ацы аз. Уый тыххæй фехъусын кодтой бархионты архайды рæзты фарстаты фæдыл советы æмбырды. Разамынд ын лæвæрдта хицауады сæрдары хæдивæг Азымты Иринæ. Архайдтой дзы Цæгат Ирыстоны бархионты змæлды минæвæрттæ æмæ организациты разамонджытæ. Уыдон сæ куыстæн хатдзæгтæ скодтой. 2019 азы бархионтæ-ирвæзынгæнджытæ нæ республикæйы сарæзтой 17 егъау мадзалы. Æппæты ахсджиагдæрыл банымадтой — Цæгат Кавказы бархионты форум «Вектор спасения — Кавказ», зæгъгæ. Бацархайдтой дзы 100 бархионæй фылдæр. Форумы кæронбæттæн, Фæсивæды хъуыддæгты фæдыл федералон агентад ацы мадзал снысан кодта 2020-æм азы федералон пъланы. Уымæй уæлдай ма, бархионтæ кодтой ахуырадон куыст дæр. Сæ хъæппæрисæй, 10 бархионы ныртæккæ кæй фæнды, уыдонæн аразынц медицинон æххуыс ракæныны дæсныйад æвдисæн ахуыртæ. Ахадгæ куыст кæнынц «бархионтæ-медиктæ». Æнæниз царды уаг парахат кæнынц, аразынц туг дæттыны акцитæ дæр æмæ æндæр пайдайаг мадзæлттæ. Æмбырды æрныхас кодтой бархионты дарддæры куыстыл. Ныртæккæ кæронмæ хæццæ кæны регионалон ресурсон центр банывыл кæныны куыст. Йæ разамонæг Хъараты Роман куы фæбæрæг кодта, афтæмæй ирвæзынгæнджыты центр байгом кæндзысты «Ахуырад»-ы национ проекты фæлгæты. Фæнд æй кæнынц Цæгат Кавказы Хæххон-Металлургон Институты бындурыл байгом кæнын. Азымты Иринæ куыд фæбæрæг кодта, афтæмæй бархионты змæлд уæрæхдæр кæныны хъуыддаг ныртæккæ паддзахадон ахсджиаг фарстатæй иу у. Ивгъуыд аз Цæгат Ирыстоны бархионтæ цы æмæзадыл равдыстой сæ куыст, уымæй разыйæ баззад. Фидæнмæ дæр сæвæрдта ахæм хæслæвæрдтæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv