Æрыгон фысджыты къорд сфæнд кодта саразын литературон проект «Асинтæ»

Æрыгон фысджыты къорд сфæнд кодта саразын литературон проект «Асинтæ». Цæгат Ирыстоны национ зонадон чиныгдоны абон ацыд сæ фыццаг презентаци. Ацы проект хъуамæ фæпайда уа, æрыгон фæсивæдæй йæхи поэзийы чи фæлвары, уыдонæн, цæмæй се ’сфæлдыстадон хъомыс æххæстæй райхæла. Араздзысты сын литературон изæртæ дæр. Уырдæм хуынд цæудзысты, цымыдисагдæр кæй цард æмæ сфæлдыстад уыдзæн, ахæм адæм. Уыдон сын сæ фæлтæрддзинад æнæвгъауæй лæвар кæндзысты. Мадзал аразæг Цъæритты Кристинæ фæнысан кодта, проекты ном «Асинтæ» дзæгъæлы кæй нæ рахуыдтой, уый. Куыд зæгъынц, афтæмæй сæ асинты къæпхæнтæ чингуытæй арæзт сты, уымæй та бамбарæн ис, адæймаг цас фылдæр кæса чингуытæ, уыйас йæ зонындзинæдты фæрцы уæлдæрæй-уæлдæр хиздзæн царды дæр æмæ сфæлдыстады дæр. Ацы фæнд сæм фæзынд уымæн, æмæ Ирыстоны цы курдиатджын фæсивæд ис, уыдонæн уа литературон изæрты архайыны фадат. Йæхи æмдзæвгæтæ фыссыныл чи фæлвары, уыдонæн уыдзæн æппæт уавæртæ дæр кæрæдзийы сфæлдыстадимæ базонгæ кæнынæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv