Славяйнæгтæ бæрæг кæнынц хæлардзинад æмæ иудзинады бон

25-æм июны æгас дунейы бæрæг кæнынц Славяйнæгты хæлардзинад æмæ иудзинады бæрæгбон. Ныртæккæ уыцы адæмыхæттыты минæвæрттæ сты 300 милуан адæймагæй фылдæр. Ацы бæрæгбон сфидар кодтой 20-æм æнусы 90-æм азты. Бæрæг кæнын та йæ райдыдтой, цæмæй славяйнаг адæмыхæттыты алы къабæзтæ сæ историон уидæгтæ ма рох кæной, сæ культурæ æмæ æнусон бастдзинæдтæ хъахъхъæной. Бæрæгбоны фæзынд абарæн ис, Советон Цæдис кæй ныппырх, уый фæстиуæгыл. Уæд равзæрд бирæ хæдбар славяйнаг бæстæтæ, хъуыдис хæлардзинад æмæ æмгуыстад ног уавæрты аразын. Стыр къахдзæфтæ ацы куысты чи скодта, ахæм фыццаг паддзахæдтæ уыдысты Уæрæсе æмæ Беларусь. Бафыстой алыхуызон бадзырдтæ æмгуыстады тыххæй. Ныртæккæ дæр ацы бæстæты сæргълæуджыты официалон арфæты бакæсæн вæййы, бæрæгбон æцæг адæмоныл кæй нымайынц, уый. Славяйнæгтæ сты Уæрæсе, Украинæ, Белорусси, Польшæ, Чехи, Хорвати, Словаки, Болгари, Серби æмæ Черногорийы цæрджыты фылдæр хай. Ацы адæмыхатт ма цæры æндæр бæстæты дæр: Венгри, Греци, Германи, Австри, Итали, суанг ма Америкæ æмæ Австралийы дæр. Стыр æвæрæн славяйнæгты иудзинадмæ хæссынц национ-культурон æхсæнадтæ дæр. Сæ руаджы æнусон бастдзинæдтæ не скъуыйынц. Иу фæлтæрæй иннæмæ адæм дæттынц се `гъдæуттæ, традицитæ æмæ славяйнаг культурæ, фидар кæны граждайнаг сабырдзинад. Ацы бон æгас дунейы дæр фæаразынц алыхуызон культурон мадзæлттæ. Фæархайынц дзы хицауад, аргъуан æмæ æхсæнады минæвæрттæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv