Цæгат Ирыстоны дарддæр иуварсгонд цæуынц, хуыцаубоны нӕ регионы цы æрдзон бæллæх æрцыд, уый фæстиуджытæ. Æнæхъæлæджы уавæрты министрады бæрæггæнæнтæм гæсгæ, æдæппæтæй хъыгдæрд баййæфтой 1500 хи хæдзары: Дзæуджыхъæуы — 45 бирæфатерон æмæ 45 хи хæдзары, поселок Южныйы — 143, Карцайы — 226, Горæтгæрон районы та — 102 хæдзары. Æппæты фылдæр знаггад хаст æрцыд поселок Южныйæн. Ам кусынц техникæйы 30 иуæджы æмæ 100 специалистæй фылдæр. Сæрмагонд къамистæ Дзæуджыхъæу æмæ Горæтгæрон районы хæдзæрттыл зылд фæвæййынц. Сергей Меняйло администрациты разамонджытæн бабар кодта, цæмæй бæлвырд хъусынгæнинæгтæ бацæттæ кæной хъыгдард баййафæг цæрджытæ æмæ бæстыхæйтты тыххæй. Уыдонмæ гæсгæ Финансты министрад хъуамæ снысан кæна хъæугæ фæрæзты бæрц æмæ сæ муниципалитеттæм арвита. Бынæттон хицауад та сæ адæммæ фæхæццæ кæндзысты. Уæ зæрдыл уын æрлæууын кæндзыстæм, раздæр Сергей Меняйло кæй рахаста бардзырд иухаттон æхцайы æххуысы тыххæй, йæ бæрц 10 мин сомы. Райсдзысты йæ, хъыгдардбаййафæг хæдзары цал бинойнаджы цæры, уыдон иууылдæр. Уæлæмхасæн хуызы ма 50-йæ 100 мин сомы онг та райсдзысты æнæ æнæмæнг хъæугæ исбонадæй чи баззад, уыцы цæрджытæ. Уымæй уæлдай, республикæйы æххæстгæнæн оргæнтæ хъуамæ рацаразой фæндаггон æмæ инженерон инфраструктурæ. Республикæйы сæргълæууæг дзуапдæттæг ведомствотæн бабар кодта, цæмæй уавæрмæ уа бæстон цæстдард. Æрдзон æвæрæнтæ æмæ экологийы министрад хъуамæ снысан кæна хъæугæ инженерон-техником мадзæлттæ, цæмæй поселок Южныйы дон мауал æмбырд кæна. Ӕнæнхъæлæджы уавæры фæтк Горæтгæрон район æмæ Дзæуджыхъуы нысангонд æрцыд 18-æм июны.