РЦИ-Аланийы ахуырад æмæ наукæйы министрады 2021-æм азы куыстытæн хатдзæгтæ скодтой

Хæстæгдæр 3 азмӕ Цæгат Ирыстоны æппæт хъæуты скъолаты бындурыл фæзындзæн «Точка роста» -йы центртæ. Уыдонæй 22 сараздзысты иннæ аз. Æдæппæтæй сæм бафтаудзысты 60. Уæлдай æргом здæхт цæуы ахуырадон уагдæтты бындурон рацарæзтмæ дæр. Кæд ацы аз 2 скъолайы сног кодтой, уæд иннæ аз хъуамæ сцалцæг кæной 63 объекты. Уый тыххæй регионæн рахай кодтой 3 миллиард сомæй фылдæр. Ацы аз хъæуты скъолаты сцалцæг кодтой 7 спортивон залы. Се 'хсæн Раздзог, Павлодольская, Ног Бæтæхъойыхъæу, Цыкола, Црау. Хæстæгдæр 2 азмӕ ма сног кæндзысты 14 спортивон залы. Журналистты фарстаты 'хсæн — профилон ахуырад. Республикæйы сæргълæууæджы бардзырдмæ гæсгæ, ацы аз фæлварæн хуызы байгом сты кадетты кълæстæ. Ныртæккæ сты 16. Дзуапдæттæг министры ныхæстæм гæсгæ, проект у æнтыстджын. Кълæсты нымæц фæнд кæнынц фæфылдæр кæнын. Ацы ахуыры аз байгом фыццаг технопарк Дзæуджыхъæуы 27-æм скъолайы бындурыл. Бæстонæй дзы ахуыр кæнынц физикæ, хими, биологи æмæ технологитӕ. 2024-æм азы кæронмæ ма регионы фæзындзæн 3 технопаркы. Уымæй уæлдай, республикæйы сарæзтой хъæуты скъолаты ахуыргæнджыты ассоциаци. Йæ хæс у райхалинаг фарстатæ сбæрæг кæнын. Федералон рухсады академийы проектмæ фыццаг кæй бахастой, уыцы регионтæй иу у Цæгат Ирыстон. Уый фæрцы æппæт ахуырадон уагдæтты разамонджытӕ ацæудзысты дæсныйад уæлдæргæнæн ахуыртæ федералон эксперттимæ. Хъæуты нӕ фаг кӕнынц скъолаты ахуыргæнджытæ. Фарстайыл кусынц дыууæ программæйы æххуысæй. Сæ иу - «Земский учитель». Ацы аз дзы бацархайдтой 15 ахуыргæнæджы. 13 архайæджы та дзы уыдзæн иннæ аз. Дарддæр æмбырды æрдзырдтой педагогон кусджыты мыздыл. Алыбегты Эллæ куыд фæбæрæг кодта, афтæмæй ацы хъуыддагæн 2022-æм азы бюджетмæ бахастой 329 милуан сомы. Уыдон сты уæлæмхасæн фиддонтæн. Ахсджиаг у скъоладзауты хæрд дæр. Йæ хæрзхъæддзинадмæ æппынæдзух сæ хъус дарынц сæрмагонд къамистæ. Ацы фарстайы, Алыбегты Эллæйы ныхæстæм гæсгæ, къуылымпыдзинæдтæ разыны. Баст сты, скъолатæй бирæтæ 2 фæлтæрæй кæй кусынц, уыимæ. Хæринæгты хыгъд январæй хъуамæ сног кæной, ныййарджыты фæнд хынцгæйæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv