Милдзыхты Вячеслав федта, Дзæуджыхъæуы хъыгдæрд цы районтæ баййæфтой, уыдон. Æппæты фылдæр боныхъæды фæстиуджытæ йæхиуыл банкъардта Южный поселок. Балка цæугæдон раивылд æмæ йæ разæй ахаста асфальт, забортæ æмæ хæдзæртты къултæ. Длиннодолинская æмæ Курганная уынгтæм ныртæккæ бацæуæн нæй. Стыр дуртæ æмæ къодæхтæ фæндаг æрæхгæдтой. Бынæттон цæрджыты цæхæрадæттæ донласт фесты, уыимæ иуæй-иутæ стурвосæй фæхъуыдысты. Шмулевич æмæ Магкæты Зурабы номыл уынгты боныхъæд зиан кæмæн æрхастса, уыцы цæрджытимæ дæр Милдзыхты Вячеслав аныхас кодта. Ам дæр кусы сæрмагонд техникæ. «Спецэкосервис»-ы 40 кусæджы дысонæй нырмæ уынгтæ сыгъдæг кæнынц. Доны лæсæнтæ сæ разæй хастой дуртæ, бырон æмæ бæлӕсты къалиутæ. Æхцайы бæрцæй зианы фæстиуджытӕ нырма хъæудзæн банымайын - фæнысан кодта Дзæуджыхъæуы администрацийы сæргълæууæг.