Ног дæсныйад лæвар райсыны федералон проектæн бæстæйы Хицауад рахай кæндзæн 2,5 миллиард сомæй фылдæ

Цæмæй цæрджытæн ног дæсныйад райсыны фадат уа, уый тыххæй бæстæйы хицауад «Куыстифтонгдзинадæн æххуысы» федералон проекты фæлгæты рахай кодта 2,5 млрд сомы. Премьер-министр Михаил Мишустин куыд фæбæрæг кодта, афтæмæй фæрæзтæ грантты хуызы ратдзысты, фæллойадон базарадæн хъæугæ кадртæ цы куыстуæттæ цæттæ кæнынц, уыдонæн. Ахæм æхцаввонгады руаджы 46 мин адæймаджы райсдзысты ног дæсныйæдтæ, се 'хсæн сывæллæтты рæвдауæндæтты хъомылгæнджытæ, аразджытæ, рог промышленносты кусджытæ. Гранттæ дæтдзæн Профессионалон ахуырады райрæзты институт, уый сси программæйы федералон оператор. Бæстæйы хицауады сæрдар бабар кодта, фæрæзтæ куыд хардзгонд цæуынц, уымæ бæстонæй кæсын. Ног дæсныйад лæвар райсын сæ бон у: æгуыст цæрджытæн, куыстæй сисынæй тæссаг кæмæн у, ахæм специалисттæн, 35 азы онг кары цæрджыты хицæн категоритæн, 50 азæй фылдæр кæуыл цæуы, уыдонæн, æнахъом сывæллæттæ кæмæн ис, ахæм мадæлтæн, Украинæйæ ралидзæг адæмæн.