Раст фæндагмæ раздахын

Цæмæй æрыгæтты хсæн закъонхæлдтытæ фæкъаддæр уой, уый тыххæй Цæгат Ирыстоны мидхъуыддæгты министрады кусджытæ æрхъуыды кодтой цымыдисаг мадзал. «Комы-Арт»-ы байгом кодтой профилон къорд «Патриот». Ис дзы 120 сывæллоны, се `хсæн – пъæлицæйы хыгъды чи ис æмæ зынвадат цард чи кæны, ахæмтæ дæр. 18 боны сын араздзысты æфсæддон ахуыртæ. Амондзысты сын хæцæнгарзимæ архайд, æрдзон уавæрты хи куыд дарын хъæуы, уыдæттæ. Уымæй уæлдай райсдзысты хæххон æмæ парашютон-десантон цæттæдзинад. Цæмæй æрыгæтты æфсæддон зонындзинæдтæ æмбæлгæ уагыл уой, уый тыххæй лагеры фæсивæдæн сарæзтой æппæт уавæртæ. Уымæй уæлдай ма лæппутæн равдисдзысты Дыгургомы рæсугъддæр бынæттæ. Сараздзысты сын фембæлдтытæ алыхуызон министрадты æмæ уагдæтты минæвæрттимæ. Суанг ма фæнд кæнынц Черчесты Станиславы æмæ Гасситы Мураты дæр æрбахонын. Аслан Кайтуков: «Семæ сараздзыстæм фембæлдтытæ, æрдзурдзыстæм фыдыбæстæмæ уарзондзинадыл. Сбæлвырд кæндзыстæм, цавæр миниуджытæй хъуамæ æххæст уа æцæг офицер, уый. Архайдзыстæм æмæ æххуыс кæндзыстæм мидхъуыддæгты министрады кусджытæн ацы æрыгæтты миддуне фæхуыздæр кæныныл». Ног лагерь байгом ис фарон сæрды нæ республикæйы мидхъуыддæгты министр Михаил Скоковы хъæппæрисæй. Министрады кусджытæ куыд фæнысан кодтой, афтæмæй мадзал æрыгæттыл хуыздæрмæ ахады. Барадхæлдтытæ къаддæр кæнынц. Фаронимæ абаргæйæ, нæ бæстæйы бæрæггæнæнты хыгъды республикæ ис 3-æм бынаты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv