Цæгат Ирыстоны цы паддзахадон программæтæ æххæст кæнынц, уыдон æххуыс сты сывæллæтты хъомыладæн аккаг уаæртæ аразынæн. Ахæм проектты фæрцы Æрæфы районы Хæзныдоны скъола фыццæгæм сентябрмæ сног кæндзысты, Цыколайы та бындуронæй рацарздзысты спортивон скъола. Ивынц электрон тыхы телтæ, бæстыхайы сæр, хъæдын рудзгуыты бынаты та æвæрд цæуынц ногтæ, пластикæй конд.  Бындурон цалцæг Хæзныдоны скъолайы райдыдта мартъийы. Вазыгджын æмæ егъау куысты кæцыдæр хай ныридæгæн кæронмæ баххæст кодтой. Скъолайы ахуыр кæны 190 адæймаджы. Хæзныдоны иунæг ахуыргæнæндоны аивгонд бæстыхайæн аргъ скæндзысты сентябры. Ноггонд уагдон хъуамӕ дзуапп дæтта нырыккон домæнтæн. Йæ рацарæзтæн рахай кодтой 40 млн сомæй фылдæр. Æппæты ахсджиагдæр бавæрæн та сывæллæтты ахуыргæнæндонмæ хæссынц адæм сæхæдæг. Æрыгон фæлтæры 'хсæн æнæниз цардыуаг парахат кæнынæн цалцæг кæнынц Цыколайы спортивон скъола. Алцыдæр дзы баивдзысты. Бокс æмæ уæгъдибар хъæбысхæсты секцитæй уæлдай дзы уыдзæн физкультурæйы ахуыртæ сæрмагонд программæтæм гæсгæ. Куыстытæм бавнæлдтой æрæджы. Разæй –  демонтаж. Аразджыты ныхæстæм гæсгæ, бæрæг у, хи хъарутæй бынæттон цæрджытæ куыд хъахъхъæдтой бæстыхай, уый. Бæстон архайдтой, фæлæ уый фаг нæу. Хъуыдис бындурон цалцæг, йæ хæрзхъæддзинадмæ цæмæй фиппайнæгтæ ма уа. Уый у æнæмæнг домæн, цæмæй фидæны ам цæуой канд республикон нæ, фæлæ ма Цæгат Кавказы æмвзæдыл ерыстæ.