Цæгат Ирыстоны паддзахадон университеты ацыд куыстдæттыны армукъа. 250 куысты бынатæй фылдæр æппæт районты дæр. Мадзал дæтты фадат зæрдæмæдзæугæ куыст равзарын, хæстæгдæр базонгæ уæвын куыстдæтджытимæ. Армукъайы руаджы къаддæр кæны ахуырады къабазы специалистты дефицит дæр. Ахуыргæнæг хъуымæтæг дæсныйад нæу, фæлæ царды нысан. Афтæ хъуыды кæны Нора Барсигян. Педагог кæй суыдзæн, уый фидарæй йæхицæн снысан кодта, нырма йыл 8 азы куы цыд, уæд. Ныртӕккӕ Нора у Цæгат Ирыстоны паддзахадон педегогон институты рауагъдон. Сентябры чызг фæнд кæны райдиан кълæсты ахуыргæнæгæй кусын райдайын. Цæгат Ирыстоны Паддзахадон университеты куыстагурыны армукъайы ис аккаг ваканситæ. 250 куысты бынатæй фылдæр: уырыссаг æмæ фæсарæйнаг æвзæгты, математикæ, информатикæ æмæ бирæ æндæр предметты ахуыргæнджытæ. Кусджытæ нæ фаг кæны алы районы дæр. Зæгъæм, рахизфарсы районы ис равзарæн 53 куысты бынатæй искӕцы. Армукъайы ис базонæн сæрмагонд скъолайы тыххæй бæлвырд информаци, уыимæ ма, фидæны цы кусджытимæ архайдзæн, уыдоны дæр. Цæрджытæн куыстдæттыны комитеты специалисттæ радзырдтой паддзахадон æххуысы мадзæлтты тыххæй. Рауагъдонтæн та бацæттæ кодтой стажировкæ кæнынæн сæрмагонд фæтк. Æртæ мæйы дæргъы сæ бон уыдзæн дæсныйадимæ хæстæгдæр зонгæ кæнын, уый фæстæ та райдайын официалон ӕгъдауӕй кусын. Ахæм армукъатæ — хорз гæнæн сты куыстдæтджытæн дæр. Зонгæ кæнынц анкетæимæ æмæ бæстонæй æрныхас кæнынц адæймагимæ. Мадзал бабæрæг кодта ахуырад æмæ наукæйы министр Алыбегты Эллæ. Фæнысан кодта, кусджытæ кæй нæ фаг кæны, уый тыххæй уæлдай фыдæбон кӕй кæнынц ахуыргæнджытæ. Афтæмæй сæм цымыдисаг æркастытæ æмæ программæты архайынæн тыхтæ дæр нал вæййы. Цалдæр сахатмæ 150 адæймагæй фылдæр сæ курдиæттæ ныууагътой, аныхас кодтой куыстдæтджытимæ, кæцыдæртæ та цæттæ сты ног ахуырадон азы рацауын куысты бынатмæ. Мадзаларазджыты ныхæстæм гæсгӕ, сæ хъуыды æнтыстджынæй æххæстгонд æрцыд. Ацы къабазы куыст дарддæр цæудзæн. Иннæ хатт фæнд кæнынц æндæр дæсныйæдтӕм гӕсгӕ армукъа саразын.