Æвзæр боныхъæд зиан кæй хæдзæрттæн æрхаста, уыцы цæрджытæн дарддæр æххуыс кæнынц. Дзæуджыхъæуы администраци абоны онг цæрджытæн æдæппæтæй радта 14 млн сомы бæрц. Рады ма ис 450 курдиаты. Цæмæй адæмæн æнцондæр уа, уый тыххæй гæххæттытæ арæзтой, хæдзæрттыл зилгæйæ. Фыццаг æркасты хатдзæгтæм гæсгæ, специалисттæ рахицæн кодтой 395 хæдзары. Æрæджы горæты администрацимæ бахъаст кодтой посёлок Южныйы Курганная уынджы цæрджытæ. Габоты бинонтæ журналисттæн фехъусын кодтой, сæ документтæ кæй фесæфтой æмæ уый тыххæй æххуыс райсыны хъуыддаджы къуылымпыдзинæдтимæ кæй сæмбæлдысты. Посёлокмæ ацыд Милдзыхты Вячеслав. Бынаты куыд рабæрæг, афтæмæй бинонты гæххæттытæ сты æмбæлгæ уавæры. Фиддон райсдзысты хæстæг рæстæг. Цæрджытæ администрацийы сæргъолæууæджы бафарстой фæндæгты цалцæгæй дæр. Милдзыхты Вячеслав куыд фæбæрæг кодта, афтæмæй Южныйы фарстатыл куыст цæуы фыццаградон фæткмæ гæсгæ.