Трамвайты фидæн

Дзæуджыхъæуы трамвайтæн сæ цæлхыты гыбар-гыбур фыццаг хатт ссыд 100 азы размæ. Цæрджытæн у уарзон транспорт. Æмæ ма кæд вагæттæ сног кæныныл архайынц, уæд рельсытæ та бынтон ныззаууат сты. Хъæуы сæ бындуронæй сцалцæг кæнын, науæд фыдбылыз æрцæуынмæ бирæ нал баззад.  Сцалцæг кæнын хъæуы дыууын трамвайы. Дзæуджыхъæуы депойы сæйраг инженер Олег Остапчук куыд радзырдта, афтæмæй вагæттыл ссæдзгай азтæй фылдæр цæуы. Æппæт куыстытæн паддзахады бюджеты фæрæзтæ фаг нæй - ног трамвайтæ балхæнынæн бирæ æхца хъæуы. Архайынц уавæр цалцæггæнæн куыстыты руаджы фæхуыздæр кæныныл. Фæлæ ног вагон зæронд æмæ зылын рельсытыл хæрдмæ портийау хауын райдайы. Уый тыххæй та уал хъæуы æфсæн фæндæгтæ баивын. Цавæрфæнды лыстæг хай дæр куы асæтты вагоны, уæд æй арвитынц техникон цæстдарды пунктмæ. Ам трамвайтæм æркæсынц æндæр специалисттæ. Сæ хатдзæг вæййы уыцы иу! Цалынмæ сын сæ фæндæгтæ нæ баивой, уæдмæ вагæттæ æппынæдзух хъæудзæн цалцæг кæнын. Чи зоны, дзой-дзойгæнгæ трамвайыл бæрнон кусджытæй искæй цæст æрхæцыд. Афтæмæй - мæнæ Хуыцауы хорзæх. Горæты разамынды уынаффæмæ гæсгæ иннæ аз цалцæггæгæн куыстытæ райдайдзысты Къостайы проспектыл, бæлвырддæр та Пашковскийæ Калинины уынджы онг. Нысангонд фæткмæ гæсгæ, дарддæр цалцæг кæндзысты Николаевы æмæ Чапаевы уынгтæ. Фæлæ куыстытæ кæд райдайдзысты, уый нырма зын зæгъæн у. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv