Санкт-Петербургы æппæтадæмон экономикон форумы 3-аг бон кæронмæ фæхæццæ кæны. Пленарон æмбырды дзы раныхас кодта бæстæйы президент Владимир Путин. Дзырдта, сæрмагонд æфсæддон операци куыд ахады бæстæйы экономикæйыл, æрныхас кодта глобалон экономикон архайдыл, стæй фидæны уавæрыл дæр. Абон ма форумы фехъусын кодтой регионты инвестицион климæты национ рейтингы хатдзæгтæ. Нæ республикæ бацыд 15 хуыздæр регионы хыгъдмæ. Фаронимæ абаргæйæ, Ирыстон фæуæлдæр иу къæпхæн æмæ ныр ис 13-æм бынаты. Форумы фæлгæты бантыст бафыссын цалдæр бадзырды. Республикæйы Горæтгæрон районы фæнд кæнынц хъæрмуæтты комплекс саразын. Проекты аргъ у 16,5 млрд сомы. Парахат дзы кæндзысты пъæмидорты алы хуызтæ, афæдзмæ - 36 мин тоннæйы. Абон ма æмгуыстады бадзырд бафыстой Мæскуыйы Æппæтадæмон ахастдзинæдты паддзахадон институты ректоримæ. Иумæйагæй æххæстгонд цæудзысты ахуырадон хъæппæристæ, наукон æмæ культурон мадзæлттæ. Уыдонимӕ – Адæмты ‘хсæн ахастдзинæдты мæскуыйаг паддзахадон институты сæрдыгон скъола Цæгат Ирыстоны студентты æмæ ахуыргæнджыты æмархайды, стæй зындгонд ахуыргæнæндоны æмæ республикæйы ахуыргæнæндæтты иумæйаг æмгуыстады фæзуат. Уый ты ахъаз уыдзæн республикæйы ахуырады райрæзтæн.