Æппæтуæрæсеон адæмон фронты уæнгтæ бæрæг кæнынц скъолаты цæттæдзинад

Æппæтуæрæсейон адæмон фронты уæнгтæ бæрæг кæнынц скъолаты цæттæдзинад ног ахуыры азмæ. Æрæджы бабæрæг кодтой Кæрдзыны хъæуы скъола. Уæлдай æргом аздæхтой кæртмæ. Уым кæсынц æдасдзинады домæнтæм. Уыимæ ма хæрæндоны куыстмæ. Уым рабæрæг кодтой фыццаг фиппайнаг дæр. Хæрæндоны вентиляцион системæ ныр къорд азы нæ кусы. Уымæ гæсгæ санитарон домæнтæ æххæстгонд нæ цæуынц. Æхсæнадон архайджытæ ма федтой ахуыргæнæн уаттæ дæр. Уым ис интерактивон фæйнæджытæ æмæ компютертæ, фæлæ сты заууат уавæры. Скъолайы кæртмæ дæр фаутæ æрхастой. Йæ алфамбылай быру кæй нæй, уымæ гæсгæ дзæгъæл фос скъолайы кæртмæ бацæуынц. Ахæм хъуыддаг æрхæссы бирæ къулымпыдзинæдтæ. Ацы аз скъола хи хъарутæй сцалцæг кодтой. Къултæ чъырæй сцагътой, пъолтæ сахуырстой. Спортивон зал та бындуронæй цалцæг кæнынц. Арæзтадон куыстытæ кæронмæ фæхæццæ кæнынц. Аразджыты ныхæстæм гæсгæ 1-æм сентябрьмæ æппæт куыстытæ дæр баххæст кæндзысты. Æппæтуæрæсеон адæмон фронты уæнгтæ куыд бафиппайдтой, афтæмæй бындуронæй сцалцæг кæнын хъæуы скъолайы бæстыхай. Ахуыргæнæндоны разамынд ацы хъуыддаг нырмæ иуварс кæнынц. Богазты Олег, Кæрдзыны хъæуы скъолайы разамонæг: «Скъола сарæзтой 1984 азы. Уæдæй абонмæ дзы бындурон цалцæджы куыстытæ нæ цыд. Ацы аз æнтыстджынæй архайæм «Образование», зæгъгæ, национ проекты. Фидæны аз фæнд кæнæм скъолдайы бæстыхай бындуронæй сцалцæг кæнын. Уыимæ ма хъармгæнæн æмæ кæрт дæр. Уыдон дæр бахастам программæмæ». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv