Фидгæ, æви нæ?

Социалон хызæгты адæм быцæу кæнынц, адæмы хæзнайыл нымад Дæргъæвсы некропольмæ бацæуынæн æхца куыд хъуамæ фидой, зæгъгæ? Ацы архитектурон æмæ историон комплекс нæ республикæйы национ музеймæ кæй хауы, уый бирæтæ нæ зонынц. Уæдæ дзы бацæуæггаг мысайнаг ныууадзын кæй хъæуы, уыцы фæтк дæр абон нæ фæзынд. Билеты аргъ у 100 сомы. Кæмæндæрты йæм лæвар бацæуыны бар дæр ис. 95 мыггаджы зæппадзы 14-æм — 18-æм æнустæй. Ацы историон-архитектурон комплексы кой æгас дунейыл дæр айхъуыст. Æрмæст нæ бæстæйы нæ, фæлæ зæххы къорийы алы кæрæттæй йæм туристтæ фенынмæ ссæуынц. Турист перуйæ Розарио Дельгадо: «Ацы бынаты мæ фæнды фылдæр боны арвитын, цас фæнд кодтон, уымæй. Æз интернеты бакастæн Дыгургом, Дзæуджыхъæу æмæ ацы зæппадзты тыххæй, æмæ мын тынг æхсызгон у, мæхи цæстæй фенын мын сæ кæй бантыст, уый. Астæуккаг æнусы цыма дæн, афтæ мæм кæсы. Мæ зæрдæмæ тынг фæцыд ацы диссаджы бынат. 100 сомы билетæн мæм зынаргъ нæ фæкаст. Ахæм музей фенынæн уый бæрзонд аргъ æппындæр нæу, ис æй балхæнæн». Дæргъæвсы зæппæдзтæм бацæуынæн фидын кæй хъæуы, уый республикæйы цæрджытæй кæцыдæртæн сæ зæрдæмæ нæ цæуы. Социалон хызæгты бирæтæ ацы фарстайы тыххæй фæбыцæу сты. 70-æм азтæй фæстæмæ ацы культурæйы цыртдзæвæн нымад æрцыд гом арвы бын музейыл. Бацæуæггаг мысайнаг ныууадзыны хабар абоны хъуыддаг нæу. Фæлæ 100 сомæй билет æлхæнын бирæты нæ фæнды. Комплекс нымад у Цæгат Ирыстоны национ музейы филиалыл. Йæ директор Къубалты Валерийы ныхæстæм гæсгæ, уыцы æхца хардзгонд æрцæуынц филиалы кусджыты мыздыл. Цы фæрæзтæ ма дзы баззайынц уымæй уæлдай, уыдонæй та саив кæнынц историон уæлмæрд. Музеймæ лæвар бацæуыны фадат ис ветерантæн, хæстон цауты архайджытæн, йе нæниздзинад хъыгдард кæмæн у, уыдонæн, æфсæддонтæн, сидзæр æмæ бирæсывæллонджын бинонты уæнгтæн. Пенсионертæ æмæ студенттæн билеты аргъ у 30 сомы, скъоладзаутæн — 20 сомы. Уымæй уæлдай ма уыдонæн мæй иу хатт фадат вæййы зæппадзтæм лæвар бацæуынæн. Цæгат Ирыстоны культурон бынты объекттæ хъахъхъæныны æмæ сæ пайда кæныны комитеты кусджыты ныхæстæм гæсгæ, Дæргъæвсы архитектурон комплексæн ис федералон нысаниуæг. Цæгат Ирыстоны культурон бынты объекттæ хъахъхъæныны æмæ сæ пайда кæныны комитеты хайады сæргълæууæг Æгайты Эмилия: «Хъæхъхъæнгæ кæнæм зæппæдзтæ. Бæрæггонд сты бæстыхайы арæнтæ дæр. Уый, нæ комитетмæ цы куыст хауы, уый кой кæнын. Паддзахад æй хъахъхъæны 60-æм азы 13-æм æмæ 27-æм уынаффæтæм гæсгæ. Куыд музейы филиал, афтæ йæ фенынæн хъæуы фидын закъонмæ гæсгæ». Бацæуæггаг мысайнаг фидыныл разы чи нæу, уыдон та сæ хъуыды æмбарын кæнынц афтæ, ома нæ фыдæлты зæххмæ бацæуыны тыххæй, уæлдайдæр, уæлмæрдтæм цæмæ хъуамæ фидæм? Бæстыхаймæ цæстдард кæй ис, йæ алфæмблай зылд æмæ сыгъдæг кæй у, уый дæр адæм æнæуынгæ не сты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv