Бизнесæн æххуыс кæныны тыххæй конференцийы

3 инвестицион проекты равдыста Цæгат Ирыстон Цæгат Кавказаг бизнесæн æххуыс кæныны тыххæй конференцийы. Байгом абон Дзæуджыхъæуы Хицауады хæдзары æмæ Цæгат Ирыстоны паддзахадон университеты. Уый тыххæй нæ республикæмæ æрбамбырд сты федералон министрадты минæвæрттæ æмæ амалхъом адæм. Тематикон æмбырдты ныхас цæуы Цæгат Кавказаг чысыл æмæ астæугкаг амалхъомдзинады рæзтæн паддзахадон æххуысы тыххæй. Абон фыст æрцæудзæн цалдæр бадзырды. Ирыстон цы проекттæ равдыста, уыдоны 'хсæн Беслæны пищекомбинаты рацарæзт. Проекты автор у компани "Карагро". Йæ сæйраг хæс та нæ республикæйы фыццаг нырыккон домæнтæн дзуапп чи дæтта, ахæм консервтæгæнæн завод саразын. Проекты аргъ у 145 милуан сомы, уыдонæй 46 милуан сомы сты организацийæн йæхи æхца. "Казачий хутор" та равдыста фæткъуы бæлæсты дыргъдон 420 гектары зæххыл рацаразыны проект. Йæ аргъ у 1 миллиард 785 милуан сомы. Уыдонæй 1 миллиард 350 милуан сомы сты организацийæн йæхи фæрæзтæ. Проекты руаджы фæзындзæн 350 кусæн бынаты. Нæ республикæйы æртыккаг проект та у хи уæзласæн машинæтæ кæм ис, ахæм логистикон парк саразыны тыххæй. Йæ аразæг - компани "Грин". Ацы проектæн та хъæуы 65 милуан сомы. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv