Карздæр цæттæдзинады уынаффæ рахаста Цæгат Ирыстоны сæргълæууæг Битарты Вячеслав

Карздæр цæттæдзинады уынаффæ рахаста Цæгат Ирыстоны сæргълæууæг Битарты Вячеслав. Бардзырд бафыста, цæмæй республикæмæ коронавирусы инфекци ма æрбахæццæ уа, уый тыххæй. Уынаффæмæ гæсгæ, фæсарæнтæй Цæгат Ирыстонмæ чи æрцыд, уыдон хъуамæ фыццаджыдæр фæхабар кæной сæрмагонд номырмæ 8-800-301-20-68. Дыууæ къуырийы сæ карантины дардзысты сæ хæдзæртты. Куыстмæ, кæнæ ахуырмæ рацæуыны бар нæй, æхсæнадон бынæттæм дæр афтæ. Куыстуæтты разамонджытæ хъуамæ цæттæ уой æмбæлгæ медицинон æххуыс ракæнынмæ. Фæткмæ гæсгæ, хъуамæ кусжытæн сæ буары тæвд æппынæндзух барой. Бæрзонд кæмæн у æмæ æхснырсæджы миниуджытæ йæхиуыл чи æнкъары, уыдонмæ уæлдай фылдæр медицинон æркаст хъуамæ уа. Сæргълæууæджы уынаффæмæ гæсгæ ма, бар нал ис дзыллон мадзæлттæ аразын. Республикæйы снысан кæндзысты арæнты сæрты цы уæззау хæдтулгæтæ цæуынц, уыдонæн æрлæууæн бынæттæ. Битарты Вячеслав домы рынчындæтты кусджытæй, цæмæй фæфылдæр кæной медицинон æркаст хæдзарон уавæрты. Промышленность æмæ транспорты министрад, стæй Æнæниздзинад хъахъхъæныны министрад хъуамæ иумæ фæстауæрц кæной дизинфекци æмæ хи бахъахъхъæныны тыххæй сæрмагонд медицинон хостæ. Коронавирус ма руадзыны тыххæй цы Оперативон штаб снысан кодтой, уый кусын райдайдзæн æхсæвæй бонмæ. Уавæры тыххæй æппæнæдзух хъусын кæндзысты республикæйы сæргълæууæгæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv