Къостайы райгуырæн бонмæ Национ чингыдоны кусджытæ бацæттæ кодтой ног проект

Хетæгкаты Къостайы 160 азы райгуырæн бонмæ Национ наукон чиныгдоны кусджытæ бакуыстой цымыдисаг проектыл. Йæ ном – «Хетагуровский маршрут»-зæгъгæ. Чиныгдоны бæстæзонæн хайады библиографты хъæппæрисæй конд æрцыдысты сæрмагонд QR кодтæ. Фенæн сæ ис Хетæгкаты Къоста кæм цард æмæ куыста, уыцы бæстыхæйтты къултыл. Нæ республикæйы ацы QR кодтæ фæзындысты æрæджы. Сæ фæрцы адæм базонынц бирæ цымыдисаг æмæ хъæугæ æрмæджытæ. Зæгъæм, нæ горæты бæстыхæйтты истори. Нæ республикæйы ацы коды сæйраг нысаниуæг у Хетæгкаты Къостайы сфæлдыстад бæлвырддæр базонын, стæй ма уыимæ йæ цардыл афæлгæсын. Ныртæккæ ацы кодтæ æдæппæтæй сты 10. Ацы проект бацæттæ кодтой нæ республикæйы национ-наукон чиныгдоны кусджытæ. Хонынц æй мобилон гид. Уый фæрцы ифтонггонд æрцыдысты Хетæгкаты Къостайы уарзон чызг Анна Попова кæм цард, уыцы хæдзар, нæ горæты наукон чиныгдон, Къоста кæм ахуыр кодта, уыцы гимназ, кæм куыста уыцы бынæттæ, æмæ уырыссаг театр. Уыимæ уырыссаг тетары цы QR код ис, уый æрмæст Къостайы сфæлдыстадимæ баст нæу. Ис дзы ссарæн бирæ æндæр цымыдисаг æрмæджытæ дæр. Зæгъæм, уырыссаг театры истори. Раздæр дзы чи куыста, уыдоны тыххæй дæр. Бигъаты Земфирæ нын куыд бамбарын кодта, афтæмæй уый йæхæдæг дæр стыр кадыл нымайы, ахæм егъау проектыл кæй бацархайдта, уый. Ацы QR кодты программæ кусы æртæ æвзагыл. Ирон, уырыссаг æмæ англисаг. Библиотекæйы разамынд ма нын куыд бамбарын кодта, афтæмæй сæм фидæны нырма бирæ куыст æнхъæлмæ кæсы. Хъæуы ма сæ сæрмагондæй ратæлмац кæнын иннæ бæстыхæйтты истори дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv