Ирон чиныджы дуне: 100 хуыздæр чиныджы бакæс

Чиныджы нысан алкæддæр æгæрон уыд. Чиныг кæсгæйæ адæймаг ахуыр кæны уæздандзинадыл, йæ Райгуырæн бæстæмæ æмæ йæ алыварс адæммæ уарзондзинадыл. Фæлæ сæвзæры дызæрдыккаг фарста: цавæр чиныг хуыздæр кæсын у - электрон æви гæххæттыл фыстæй? 3-æм аз Национ наукон библиотекæ йæ фонды чингуытæ мыхуыр кæны электрон хуызы дæр. Æрхъуыды кодтой проект «Ирон чиныджы дуне: 100 хуыздæр чиныджы бакæс». Интернетæй сæ алкæй бон у бакæсын.  Чингуытæ нырыккон технологитæм гæсгæ ныффыссын. Ахæм куыстыл æххæст у Алыксандр Мезенцев. Национ наукон библиотекæйы кусы 2011 азæй фæстæмæ. 3 азы та йæ фыццаг æххуысгæнæг у - сканер. Йæ куыст у цымыдисаг. Æнцон дæр æй не схондзынæ. Фæстаг рæстæг адæм чиныгдонмæ арæх нал цæуынц. Алыксандр дæр сæ хорз æмбары. Бирæтæ фылдæр литературæ электрон хуызы кæсынц. Уый зонгæйæ, национ библиотекæйы кусджытæ архайынц чингутытæ æндæр хуызы рауадзын.Зæгъæн ис æмæ сын дæттынц 2-аг цард. Куысты зындзинæдтæ куыннæ вæййы. Бирæ хатт сканеры сыф æнæхъæнæй нæ разыны. Уый та уымæн æмæ чингуытæ ставд сты, вæййы дзы бирæ сыфтæ. Бирæ хатт ма люминисцентон лампа хорз нæ фæкусы æмæ уæд электрон сыфты фæзыны урс хах. Фæлæ йе сраст кæныныл Александр хорз бакусы. Библиотекæйæн ис сæрмагонд сайт. Ис дзы бирæ алыхуызон æмæ цымыдисаг æрмæджытæ. Чингуытæ электрон хуызы рауагътой закъоны домæнтæм гæсгæ. Ныр хъæугæ æрмæг ссарæн æмæ бакæсæн ис интернеты. Æхсызгон ма уый у сæрмагонгд цæстдард ирон фысджыты уацмыстæм кæй цæуы, уый. Уый тыххæй арæзт æрцыд электрон проект «Ирон чингуыты дуне: 100 хуыздæр чиныджы бакæс». Хæтæгкаты Къоста, Кочысаты Розæ, Малиты Георги, Калоты Хазби, Джыккайты Шамил æмæ ма бирæ æндæр фысджытæ. Литературæйы къæбицмæ стыр æвæрæн чи бахаста æмæ йæ уацмыстæ бирæ фæлтæртæн уарзон кæмæн систы, уыдон. Ирон литературæ йæ мадæлон æвзагыл кæсын чи уарзы, уыдоны зæрдæтæм электрон проект фæцæудзæн. Уымæй уæлды ма сканеры рауагътой æмæ интернеты равæрдтой цымыдисаг бæстæзонæн литературæ дæр. Чингуыты дуне йæхицæн чи раргом кодта уыдонæн æрхæсдзæн цин æмæ базонгæ кæндзæн ног хабæрттимæ. Райсдзысты ног зонындзинæдттæ, кæнæ та сæ фæфылдæр кæндзысты. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv