Костайыхъæуы цæрæг Тотиты Аслан кæны дыргъдоны куыст

Костайыхъæуы цурты чи ацæуы, уымæн йæ цæст æрхæцы хæрззылд дыргъдоныл. Сты Тотиты Асланы. Бæлæстæй дыргъдоны бындурæвæрæг йæ фыд уыдис. Куыдфæстæмæ лæппуйы зæрдæмæ ацы куыст афтæ фæцыд, æмæ йыл йæ зæрдæ нал сивта. Базыдта йын йæ сусæгдзинæдтæ, арæхстджынæй сæ пайда кæны æмæ йæ зайæгойтæ дæр фыдæнхъæл нæ фæкæнынц. Хæдзарад бабæрæг кодта нæ уацхæссæг Плиты Хетæг дæр. Дыргътæ йæ зæрдæмæ фæцыдысты. Тотиты Аслан кæд нырма æрыгон лæппу у, уæддæр дыргътæ зайын кæныны хъуыддагыл иузæрдион у. Ар хсы йæм. Ацы дыргъдон йæ фыд ныссагъта авд азы размæ. Ис дзы алтъамитæ, балы хуызтæ, чылауи, æмæ æндæртæ. 4 азы дæргъы йæ алтъамитæ раттынц хъæздыг тыллæг. Фарон, зæгъæм, сæмбырд кодтой 15 тоннæмæ `ввахс 2-уæ гектарæй. Ныртæккæ йын, уыцы куыст ма чи кæны, ахæм ныхмæлæуджытæ уæвгæ дæр нæй. Цæмæй нæ фæлхасгæнджытæм фагæй хæццæ кæной, уыйтыххæй сæ амалхъом адæм Цæгат Ирыстонмæ ласынц æндæр рæттæй. Фæлæ уыдон адæмы зæрдæмæ тынг нæ цæуынц бæлвырд аххосæгтæм гæсгæ. Фæлæ æппæтæй фылдæр сæ дыргъдоны ис фæткъуы бæлæстæ. Сæ фæзуат - 12 гектары. Алкæмæй дæр дзы сисынц 15 тоннæмæ `ввахс тыллæг. Сæ сортытæ сты алыхуызон. Æмæ кæд алтъамитæ чи зайын кæны, уыдон республикæйы кадавар сты, уæд фæткъуыйы дыргъдæттæ та бирæтæм ис. Фæлæ нæхи цæрджытæ сæ тыллæг æфснайыныл куы балæууынц, уæд Цæгат Ирыстонмæ сæ ных саразынц æндæр регионты зæхкусджытæ дæр. Афтæмæй нæхиуæттæн зын вæййы сæ тыллæгæн аккаг бынат ссарын. Цы `рзайынц кæнынц, уый ауæй кæнынц æрмæстдæр нæ республикæйы. Иннæ регионты фаг дæр сæм æрзайы, фæлæ сæм дыргътæ уырдæм аласыны хъарутæ нæма ис. Нæ республикæйы сын сæ тыллæджы хæрзхъæддзинад чи базыдта, уыдон сыл иузæрдион вæййынц уæдæй фæстæмæ. Зонынц æй, се `нæниздзинадæн зиан кæй не `рхæсдзысты, уый. Къостайыхъæуккаг Тотиты Асланæй хуыздæр ничи зоны, ацы куыст кæнын зын кæй у. Бæлæстæм алы бон дæр зилын хъæуы. Æмæ сæм зилы. Раст ын цыма хи бинойнæгтæ сты, уыйау сæм йæ хъус дары. Сæ къалиу сæ искæмæн куы `рсæтты, уæд ын тынг хъыг вæййы. Фæллайгæ дæр бакæны. Фæлæ зæххы куыстæй исы удæнцойдзинад. Æмæ йын уый йæ тыхыл тых æфтауы. Плиты Хетæг _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv