Æвзæр чи уыны æмæ æвзæр чи хъусы, уыцы сывæллæттимæ кусынц автоматизацигонд хъæрмуаты

Дзæуджыхъæуы ахуырдон центр, æвзæр чи уыны æмæ æвзæр чи хъусы, уыцы сывæллæттимæ кæм кусынц, уый рамбылдта автоматизацигонд хъæрмуат. Сывæллæттæн уавæртæ арæзт цæуынц федералон программæ «Нырыккон скъола»-йы фæлгæты, национ проект «Ахуырад» æххæстгæнгæйæ. Проектыл куыст цæудзæн æнæхъæн афæдз. Сæ сæйраг нысан - сывæллæттæн центры цы зонындзинæдтæ дæттынц, уыдоны руаджы сæ фидæныл хуыздæры рдæм сахадын. Сæхæдæг нырма хæрзæрыгæттæ, фæлæ аудгæйæ æмбæрзынц ногсагъд уырыдзытæ. Дзæуджыхъæуы уæзхъус æмæ къуырма сывæллæттæн сæрмагонд центры ахуыр кæны 70 сабийæ фылдæр. Зайæгойты мыггæгтæ хи къухтæй æрзайын сын амонын райдыдтой хæрз æрæджы. Ацы хъомыладон центры архайынц ууыл, цæмæй йе нæниздзинад цудыд кæмæн у уыцы сывæллæттæн сæ фидæны дæсныйад æнцондæр равзарæн уа. «Ахуырад»-ы национ проекты фæрцы скъолайы хъомылгæнинæгтæн ныр сæ авналæнтæ фестырдæр сты. Цы автоматизацигонд хъæрмуат рамбылдтой федералон программæ «Нырыккон скъола»-йы фæлгæты, уый цымыдис æмæ разæнгард кæны кæстæр æвзонг специалистты. Техникæйæн йæ фылдæр кусы автоматикон хуызы. Уæдæ ныййарджытæ дæр цин кæнынц ног кусæнгæрзтæй ифтонг кабинетыл. Ирина Айдарова, ныййарæг: «Мæнæн куыд ныййарæгæн, ахсджиаг у ацы проекты фæлгæты мæ сывæллонæн æмæ ахуырадон центры иннæ сывæллæттæн дæр фадат фæзын профессионалон æгъдауæй сæ фидæн равзарын. Кæй зæгъын æй хъæуы ахæм сывæллæттæн царды сæхи ссарын зын вæййы. Зæрдæ дарын ам цы практикæ райсдзысты уый сын баххуыс кæндзæн дарддæр куыст ссарын». Алыхуызон мигæнæнтæй пайдагæнгæйæ ам зайын кæнынц хæрдмæ тынг чи нæ сырæзы ахæм культурæтæ. Уырыдзы, хъæдур, хъацæнтæ кæмæй рауайы ахæм кæрдæджытæ, гагадыргътæ æмæ цъæх хъæдындз. Тæрхæджытæм ам дон цæуы хи æгъдауæй. Уыимæ æрвылаз дæр. Хъармуаты кусы зайæгойтæн ультрафиолет чи дæтты ахæм модуль дæр. Мыггаджы талатæ ам арвитдзысты æртæ къуырийы. Æрвылаз дзы æрзайын кæнæн ис хæрынмæ бæзгæ халсарты мыггаг æмæ дидинджытæ. Ахсджиаг у сабитæн æмбарын кæнын фотосинтез æмæ æндæр ног ныхæсты мидис. Скъолайы хъомылгæнинæгты ма ахуыр кæнынц хъæбæр гæххæттимæ кусыныл дæр. Федералон программæйы архайæг скъолаты сæйраг нысан «Доброшкола». Проект арæзт у йе нæниздзинад хъыгдард кæмæн у, ахæм сывæллæттæн баххуыс кæнынæн. Профориентацион куыст ацы скъолайы дарддæр дæр æххæст кæндзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv