Цæгат Ирыстоны хицауады уæнгтæ æрдзырдтой, президенты уынаффæтæ куыд æххæстгонд цæуынц, ууыл

Фыццаг медицинон-санитарон æххуыс бакæныны системæйы райрæзтыл æмæ скъоладзауты тæвд хæринаджы уавæрыл æрдзырдтой хицауады хæдзары. Æмбырды архайдтой Цæгат Кавказы федералон зылды Уæрæсейы президенты æххæстбарджын минæвары хæдивæг Максим Владимиров æмæ республикæйы хицауады сæрдар Дзанайты Барис. Майы президент фыццаг медицинон-санитарон æххуысы тыххæй цы указ бафыста, уый райрæзты тыххæй радзырдта æнæниздзинад хъахъæнынады министры хæстæ рæстæгмæ æххæстгæнæг Тебиаты Сослан. Республикæйы районты, дæрддзæф хъæуты арæзт цæуынц фелсырон-акушерон пункттæ æмæ амбулаторитæ. Ныридæгæн цæттæ сты 38 объекты. Кусын райдыдта медицинон-санитарон æххуысы регионалон центр. 25 медицинон уагдоны куыстӕн у пайда. Республикæйы ахуырад æмæ наукæйы министр Алыбегты Эллæ та радзырдта скъоладзауты лæвар хъарм хæринагæй ифтонгады тыххæй. Хойрæгты хæрзхъæддзинад бæрæг кæнынæн ахуырадон организациты сарæзтой сæрмагонд къамистæ. Се 'хсӕн, æнæмæнг, ис сывæллæтты ныййарджытæ. Уавæрмæ йæ хъус дары Фæлхасгæнджытæм цæстдарды регионалон управлени дæр. Æххуысцух бинонты сывæллæттæй 5-æмæй 11-æм къласмæ чи ахуыр кæны, уыдоны аходæнæн Республикæйы сæргълæууæджы бардзырдмæ гæсгæ, рахай кодтой 36 милуан сомы. Уымæй уæлдай дистанцион ахуырты рæстæг скъоладзаутæн лæвæрдтой хойражды чыргъæдтæ. Максим Владимиров куыд фæбæрæг кодта, афтæмæй уæлдай æргом аздахын хъæуы хæрæндæтты ифтонгадмæ. Медицинон æххуысыл дзургæйæ та, фæнысан кодта, диспансеризаци фæтагъддæр кæнын кæй хъæуы, уый. Дзанайты Барис куыд фæнысан кодта, афтæмæй Владимир Путины фæдзæхстытæ баххæст кæнын Республикæйы хицауадæн у уæлдай ахсджиаг хъуыддаг. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv