Цæгат Ирыстоны æнтыстджынæй æххæст кæнынц газ хæдзæрттæм лæвар уадзыны программæ

Цъæх артаг алы хæдзармæ дæр. Цæгат Ирыстоны æххæстгонд цæуы газæй ифтонгады паддзахадон программæ. Куыстытæ сты «Газпром газораспределение Владикавказ»-ы бæрны. Ныридæгæн цъæх артаг бауагътой 396 зæххы хаймæ. Æдæппæтæй та ног хæтæлты руаджы æрдзон газæй сифтонг кæндзысты 1 мин 144 хæдзары. 2030-æм азмæ газ фæзындзæн дæрддзæф хъæуты дæр. Хи хæдзар – Гайты бинонтæн се стырдæр бæллиц уыд. Æмæ сæ къухы бафтыд. Фæлæ бинонтæн ног цæрæнбынатмæ ралидзыны фадат нæ уыд. Сæ уынджы газы хæтæлтæ нæ разынд. Уæд Аннæ фехъуыста хæдзæрттæ лæвар газæй ифтонг кæныны программæйы тыххæй. Балæвæрдта курдиат. Цъæх артагмæ æнхъæлмæ кæсын бинонты бирæ нæ бахъуыд. Уæдæ Гиккайты хæдзары та газ уæвгæ дæр никуы уыд. Зымæгмæ-иу самал кодтой, æппын къаддæр, дыууæ уæзласæн хæдтулгæйы дзаг сугтæ. Цалдæр мæйы размæ сӕ хæдзардарæг фæмард. Ныр сылгоймаг иунæгæй хъомыл кæны æртæ сывæллоны. Газ лæвар æрбауадзыны тыххæй бадзырд бафыссын æнцон хъуыддаг у. Хъæуы бадӕттын хæдзар æмæ зæххы гæххæтытæ, ситуацион пълан, ИНН æмæ паспорт. Æртæ бонмӕ «Газпром»-ы специалисттæ æппæт документтæм æркæсынц. Дарддæр хæдзæрттæ сифтонг кæнынц цъæх артагæй лæвар. Хи зæххы хайыл цы куыстытæ хъæуы бакæнын, уыдонæн цæрджытæ дзуапп дæттынц сæхæдæг. Æрмæст ис иу домæн. Куыстытæ хъуымæ бакæна, сæрмагонд лицензи кæмæ ис, ахæм куыстуат. Специалистты ныхæстæм гæсгæ, ацы хъуыддаджы дæр адæмæн сæ фылдæр равзарынц «Газпром»-ы лæггæдтæ. Ныридæгæн республикæйы хæтæлтæ уагъд æрцыд 396 хæдзармæ. Октябрскæйы цæрæг Косты Зæлинæ дæр курдиат балæвæрдта. Дыууæ сывæллонимæ бинонтæн, афæдзы размæ цы хæдзар самадтой, уырдæм ралидзыны фадат нæ уыд. Цы 'хцайы фæрæзтæ сæм уыд, уыдон, сылгоймаджы ныхæстæм гæсгæ, арӕзтадон куыстытыл бахардз сты. Æмæ ахæм хæдзæрттæ Горæтгæрон районы ис 112. Кусджытæ зæххы бынты хæтæлтæ уадзынц æрвылбон. Æнæ цъæх артагæй нæ баззайдзысты дæрддзæф хъæуты цæрджытæ дæр. Уый тыххæй аразынц магистралон, стæй хъæуты 'хсæн æмæ хъæуты мидæг хæтæлтæ. 2030-æм азмæ Цæгат Ирыстоны хъуамæ газæй сифтонг кæной 100%. Ныртæккæ республикæйы хицауад кусы социалон гæнæнтыл. Кусы, цæмæй цæрджыты хицæн категоритæн снысан кæной льготæ, хи зæххы хайыл цы куыстытæ хъæуы бакæнын, уыдонæн. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv