Малиты Георгийы поэмæ «Темур-Алсак»-ыл Цæгат Ирыстоны исынц киноныв

Малиты Георгийы поэмæ «Темур-Алсак»-ыл Цæгат Ирыстоны исынц киноныв. Йæ режиссер Сæлбиты Аким зæрдæ æвæры, поэмæйы сюжет æмæ куыд ист у, уый киномæ кæсджытæн цымыдисаг кæй уыдзæн, уымæй. Кæрдтимæ тох, бæхтимæ æмæ хæстон архайд. Сценариймæ гæсгæ сæйраг архайæг бахауд знаджы къухмæ. Йæхи ирвæзынгæнгæйæ цы фыдæвзарæн фæндæгтыл фæцыд. Йæ уарзон чызджы кад куыд хъахъхæдта. Уый режиссер равдисдзæн æргом аивадон æвзагæй. Иу сусæгдзинад дæр ма уын схъæр кæндзыстыæм – кинонывы архайы зындгонд каскадер. Хæзныдоы хъæдæй рауад æцæг киноисæн фæз. Репетицитæ сæ тæмæны бацыдысты. Артисттæ æвæлладæй сæхиуыл кусынц. Режиссер Сæлбиты Аким дæр йæ къордимæ иумæ кусы. Кæмдæр йæ ныхас карз дæр рауайы, фæлæ йæхæдæг зæгъы, æнæ уымæй нæй, зæгъгæ. Куыст æнцон нæу, æмæ куыд æмбæлы, хъуамæ афтæ рауайа. Кино исынц Малиты Георгийы поэмæ «Темур-Алсак»-мæ гæсгæ. Кинонывы сюжет у цымыдисаг. Хъæздгуыты æмæ мæгуырты хсæн æнусон тохыл, æнамонд уарзондзинад æмæ æцæг хæлардзинадыл.  Кинорежиссер æппæт хабæрттæ нæ хъæр кæны. Фæнды йæ, цæмæй кинонывмæ куы бакæсой адæм, уæд сæ æнæмæнг бафæнда поэмæ чиныджы бакæсын. Уырыссаг æвзагмæ йæ раджы ратæлмац кодтой. Æвæрд æрцыд зындгонд театрты сценæйыл. Сæйраг ролтæ та хъазынц номдзыд актертæ. Ныр ацы кинонывы та архайынц бæхты паддзахадон драмон театр «Нарты»-йы бæхылбадджытæ. Йæ хъуыдытæ кинонывы равдисын æмæ сæ куыд æмбæлы афтæ сæвæрыныл Сæлбиты Акимæн æххуыс кæны Уртаты Эльбрус. Уый 26 азы цæры Хуссар-Африкæйы. У каскадер æмæ сценарист. Бирæ рæстæг кусы кинематографы. Ис æм барджытæ æмæ йæхи бæхтæ. Йæ райгуырæн бæстæ рох никуы кæны. Арæх æрцæуы ардæм. Ацы хатт æрцыд бæрнон хъуддаджы фæдыл. Йæ райгуырæн бæстæйы кинонывыл кусы фыццаг хатт. Каскадер Уртаты Эльбрус: «Бирæ хатт бакуыстон историон нывты. Мæ зæрдæмæ тынг цæуынц. Мæ миддунемæ сты тынг æввахс. Ныр дæр нæ фæнды, цæмæй ацы кинонывы кæсджытæн балæвар кæнæм æцæгæйдæр ахæм æнкъарæн, цæмæй йæ дисы бафта æмæ цавæрдæр хъуыддæгтыл ахъуыды кæны. Фендзыстæм, хъуамæ хорз рауайа. Рæстæг нæм бирæ нæй, фæлæ мах æппæт тыхтимæ бацархайдзыстæм». Цæгат ирыстонмæ Эльбрус ссыд йæ фырттимæ. Æппæты зындæр трюкты уыдон архайынц. Лæппутæ нæдæр иронау дзурынц, нæдæр уырыссагау. Фæлæ сæ разы æдзухдæр ис сæ фыд.  Уый сын у æххуыс. алцыдæр сын æмбарын кæны. Ныридæгæн съемкæтæ сæ тæмæны бацыдысты. Цавæрдæр хай ист æрцыд Мæскуыйы. Ирыстоны ма хъæуы æппæты къаддæр иу мæй бакусын съемкæтыл. Сæлбиты Акимы ныхæстæм гæсгæ, бирæ нал хъæуы. Фæззæджы кæрон фенæн уыдзæн ирыстоны ист кин фенæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv