Фыццаг дзæнгæрæг азæлыд Алайнаг гимназы

Фыццаг дзæнгæрæг азæлыд Цæгат Ирыстоны дæр. Нæ республикæйы ацы хъуыддаг 1-æм нæ, фæлæ 4-æм сентябры кæй æрцыд, уый ахджиаг у. Нæ программæйы уырыссаг хайы дæр ма ууыл ныхас кодтам. Абон скъоладзаутæ зонындзинæдты фæндагыл æрлæууыдысты. Афтæ Алайнаг гимназы дæр. Йæ сæйраг хæс у ирон æвзаджы райрæзтыл æмæ рæзгæ фæлтæры хъомыладыл бакусын æмæ йыл кусынц! Ахуыргæнджытæ архайынц æрмæст æвзаг бахъхъæныныл нæ, фæлæ ма, фидæны фыдыбæстæйæн кад чи кæндзæн, ахæм фæсивæды схъомыл кæныныл дæр. Фыццагкъласонтæ - 20-æй фылдæр - скъолайы къæсæрæй бакъахдзæф кодтой. Зонындзинæдты бонæй рауад æцæг бæрæгбон. Нæ уацхæссæг Къутæрты Аидæ дæр уыди уым æмæ бæлвырддæр радзурдзæн. Сæрдыгон æнæмæт фæлладуадзæн бонты фæстæ ралæууыд ног ахуыры аз. Хъазæнты бæсты чингуытæ, тетрæдтæ æмæ фыссæнгæрзтæ. Ацы сабитæ абон гимназмæ бакъахдзæф кодтой фыццаг хатт. Сæ цинæн кæрон нæй. Сæ зæрдæты та гуырынц ног цымыдисаг æнкъарæнтæ. Республикæйы сæргълæууæг Битарты Вячеславы хъæппæрисæй æртæ азы размæ байгом алайнаг гимназ. Ацы скъолайæн йæ сæйраг нысан у ахуырадон процесс ирон æвзагыл рацаразын, цæмæй сывæллæттæ сæ мадæлон æвзаг бындуронæй базоной, уый тыххæй. Гимназы директор Цæразонты Мадинæйы ныхæстæм гæсгæ, фаронимæ абаргæйæ сабиты нымæц дзæвгар фæфылдæр. Уымæ гæсгæ сын рахай кодтой æртæ къласы. Алы къорды дæр фæйнæ 20 сывæллоны. Уымæй уæлдай скъолайы гæнæнтæ дæр фæуæрæхдæр сты. Гамназы уавæртæ зынгæ фæпарахатдæр сты. Ныртæккæ сæм фæзындысты ног цалцæггонд кълæстæ дæр. Ис дзы кълас ног технологон фæрæзтимæ, робототехникæйы дæр райдайдзысты сæхи фæлварын. Уымæй уæлдай ахуыргæнджытæ архайынц сывæллæтты логикон хъуыдыкæнынад фæхуыздæр кæныныл æмæ сæ арæхстдзинадыл бакусын. Абон сывæллæттимæ ахуыры азыл бацин кодтой нæ республикæйы хицауады минæвæрттæ æмæ æхсæнадон архайджытæ дæр. Хицауады уæнгты ныхæстæм гæсгæ, нæ республикæйы гимназ пайда кæны ног ахуырадон методикæйæ, æрвылаз рæзынц йæ гæнæнтæ. Иумæйагæй, Алайнаг гимназ иннæ скъолаты ‘хсæн барæг дары йæ асджиаг хæстæ æмæ сæрмагонд нысаниуæгæй. Афтæ хъуыды кæны нæ горæты Æхсæнадон змæлд "Иры Стыр Ныхас"-ы сæргълæууæг Кучиты Руслан. Алайнаг гимназы кусджытæ сывæллæтты бæрæгбон барæсугъд кодтой цымыдисаг концертон программæйæ. Фыццагкъласонтæ та бацæттæ кодтой æмдзæвгæтæ æмæ чысыл равдыстытæ. Къутæрты Аидæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv