«Алания» - афтæ хуыйны Краснодары крайы цæрæг ирæтты национ æхсæнадон организациты ног цæдис

«Алания» - афтæ хуыйны Краснодары крайы цæрæг ирæтты национ æхсæнадон организациты ног цæдис. Йæ снысан кæныны тыххæй уынаффæ рахастой канд Краснодары крайы нæ, фæлæ ма æгас Уæрæсейæ дæр ирон диаспорæты минæвæрттæ. Уыди сын сæрмагонд фембæлд Сочийы. Æмбырды ног цæдисæн снысан кодтой йæ фæткæвæрд æмæ йын разамынд чи дæттдзæн, уый. Чи уыдзæн, уый базыдта нæ уацхæссæг Къутæрты Аидæ. Бæлвырддæр йæхæдæг радзурдзæн. Мæргъиты Анатолий расидтис, цæмæй Краснодары фæзына Æхсæнадон организациты автономон цæдис. Уымæ уыцы хъуыды фæзынд, æрæджы Краснодары цы æмбырд арæзт æрцыдис, уым. Бацархайдтой дзы Цæгат æмæ Хуссар Ирыстоны минæвæрттæ, стæй Сочийы бынæттон администарцийы кусджытæ. Æмбырды архайджытæ Мæргъиты Анатолийы хъуыдыйымæ иууылдæр сразы сты. Бæгъиаты Алан, Национ фарстаты ахастдзинæдты министры хæдивæг: «Уæрæсейы Федерацийы абоны онг цыдæриддæр диаспорæтæ ис, уыдонимæ нæ æхсæнадон хайад рагæй кусы. Ацы форум ныртæккæ махæн тынг ахсджиаг у». Мæргъиты Анатолий ныртæккæ у Æхсæнадон организациты автономон цæдис сæргълæууæг. Æмбырды архайджытæ йыл иууылдæр схъæлæс кодтой. Уымæн æмæ сын æнæзонгæ нæу. Зонынц æй куыд Цæгат, афтæ Хуссар Ирыстоны дæр. Æмæ ма уыимæ Уæрæсейы дæр. Ацы автономон цæдисы æмрæнхъ сты Сочийы æмæ Геленджиккы горæтты ирон æхсæнæдтæ. Æмæ ма уыимæ Краснодары æхсæнадон организаци «Алан» дæр. Мæргъиты Анатолий, Сочийы ирæтты националон-культурон æхсæнадон организаци «Алани»-йы сæргълæууæг: «Ацы цæдисы сæйраг нысан у, цæмæй мах бахъахъхъæнæм нæ мадæлон æвзаг æмæ традицитæ. Мах фæнды, цæмæй æнæхъæн бæстæйы дæр ирон адæмы культурæ хъуыстгонд уа». Ног организацийæн разæрстой сæрмагонд логотип. Уыимæ кадджын мадзалы фæрцы æвдыст æрцыдысты националон зарджытæ. Æма ма æмбырды архайджытæ бакастыты æмдзæвгæтæ дæр. Къутæрты Аидæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv