Ацы аз Цæгат Ирыстоны 37 мины сывæллонæй фылдæр баулæфдзысты дзæбæхгæнæн кампанийы фæлгæты

Цæгат Ирыстоны 37 мины сывæллонæй фылдæр баулæфдзысты ацы аз дзæбæхгæнæн кампанийы фæлгæты. Хъуыддагæн республикон бюджетæй рахай кодтой 232 млн сомы. Уый тыххæй йæ телеграм-каналы фехъусын кодта фæллой æмæ социалон райрæзты министр Айдарты Алинæ. Ныртæккæ цæттæгæнæн мадзæлттæ райдыдтой. Ноггонд цæуы улæфæн бынæтты номхыгъд. Бахастой йæм республикæйы 140 куыстуаты, се 'хсæн социалон хъахъхъæнынады уагдæттæ: «Доброе сердце», «Горный воздух», «Тæмискъ» æмæ Алагиры районы социалон лæггæдты центр. Сывæллæтты æрвитдзысты Сау денджызы былмæ дæр. Ныртæккæ, уалдзыгон каникулты рæстæг, скъолаты ис лагерьтæ. Уыдоны улæфынц 7 мин ахуыргæнинагæй фылдæр. Апрелы та 120 сабийы фæнд кæнынц арвитын «Тæмискъ»-мæ.