Юлиана Контопаулос сæххæст кодта йæ бæллиц. Уыимæ ма йын расайдта пайдайаг хъуыддагмæ. Сылгоймаг бирæ дæсныйæдты фæлвæрдта йæхи, фæлæ йæ зæрдæмæ нæ цыдысты. Ныртæккæ социалон контракты руаджы байгом кодта хъæдæрмæг æмæ згъæрæй конд дзауматæ аразæн куыстуат. Уарзон куыст ссарын æмæ дзы æнтыстджынæй архайын у стыр амонд. Ахæм хъуыдыйыл хæст у Юлианнæ Контопаулос. Хъуыды дæр ыл никуы акодта искуы хъæддæсны суыдзæн, ууыл. Ахуыр кодта ветеринарыл. Йæ бæллиц уыд цæрæгойты дзæбæх кæнын. Фæлæ йæ фæнд нæ сæххæст. Юлианнæ дарддæр ахуыр кæнынмæ бацыд Петербургы паддзахадон университетмæ. Каст фæцис дизайны факультет. Уый фæстæ та къорд азы бакуыста алы къабæзты, фæлæ йæ зæрдæйæн адджын нæ уыдысты. Радон хатт йæ куысты бынат куы ныууагъта, уæд йæхи бамбарынмæ ацыд Гуырдзыстонмæ улæфынмæ. Бæстæйы сæйраг горæты тезгъо кæнгæйæ бабæрæг кодта хъæдæрмæгæй конд дзауматы чысыл дукани. Йæ зæрдæмæ афтæ тынг фæцыдысты æмæ сфæнд кодта сæ аразын йæхи куыстуаты. Кæд æвзонг чызгмæ фæлтæрддзинад нæ уыд, уæддæр æй фæндыд ногдзинæдтæ базонын. Хатгай иу ын йæ конд продукци æлхæнгæ дæр ничи кодта, фæлæ иу йæ ныфс нæ асаст. Куыста ног эскизтыл. Уырныдта йæ æнтытджын кæй уыдзæн, уый. Уыцы рæстæг базыдта социалон контракты тыххæй. Балæвæрдта сæрмагонд курдиат æмæ райста 250 мин сомы. Республикæйы социалон контракттæй арæхдæр пайда кæнын райдыдтой. Цæрджытæн хорз æххуыс сты хи хъуыддаг байгом кæнынæн. Социалон контракттæ хорз хъомыс сты амалхъомады райрæзтæн, фæзыны ног куысты бынæттæ. Æххуысы фæрæзæй регионы спайда кодтой цыппар сæдæ амалхъом адæймагæй фылдæр. Æмæ уый кæронбæттæн бæрæггæнæн нæу. Уазиты Зæлинæ