Университетты 'хсæн студентон экспедициты программæ "Открываем Россию заново"-йы дыккаг къæпхæны уæлахиздзауты æвзæрстыты хыгъдмæ бацыд Цæгат Ирыстон дæр. Æппæт бæстæйæ 15 адæймагæн сæ бон у Цæгат Кавказмæ ссæуын æмæ сæрмагонд картæйы арæзтады бацархайын. Уый æххуыс уыдзæн, Цæгат Кавказы федералон зылдмæ балцы чи ссæуа, уыдонæн æнцонæй æмæ пайдаимæ сæ рæстæг арвитынæн. Экспедици "Карта гостя Кавказа. Концепция программы лояльности"-йы бацархайыны фадат ис Уæрæсейы ахуыргæнæндоны студенттæн, 18-æй 35 азы онг кæуыл цæуы, стæй маркетинг æмæ PR-ы, туризмы, социологи æмæ культурологийы къабæзты специалисттæ. Балцы сæйраг нысан у – туристон инфраструктурæ сбæрæг кæнын, афтæмæй уазæджы картæйы концепцийыл бакусын. Уый руаджы фидæны бæлцæттæ æнцонæй араздзысты сæ балцвæд.