Мæскуыйы сарæзтой аивадон изæр ирон кафт æмæ зæрдимæ

Ирон аив дзырдæн кад кæнынц Мæскуыйы дæр. Ивгъуыд фæлладуадзæн бонты дзы сарæзтой сфæлдыстадон изæр. Æрæмбырд æм сты, ирон аивадæн йæ зæрдæйыл хуыд кæмæн у, уыдон. Сæ размæ сын рахастой культурæйы къæбицы хуыздæр æвæрæнтæ. Чи `рбацыд, уыдон сæм æхсызгонæй бакастысты. Æрбацæуджыты `хсæн уыдис нæ уацхæссæг Пелиты Сабинæ дæр. Ныртæккæ йæ ахуыры хъуыддæгты фæдыл ис Мæскуыйы æмæ изæрырдæм йæ зæрдæ кафт æмæ зард æрцагуырдта. Уыимæ афтæ, æмæ ма йæм суанг нæ программæйæн æрмæг саразыны хъуыды дæр фæзынд. Æмæ йæ аразгæ дæр скодта. Гæнæн нæй, 2 мин километрæй æддæдæр æрвыст сюжет куыннæ хъуамæ равдисæм. Гъемæ уын æй æвдисæм. Цымыдисаг концертмæ байхъусын æмæ йæ архайджытæн аккаг аргъ скæнын. Ахæм хъуыдыимæ концертмæ саккаг кодтой, ирон аивад йæ зæрдæйыл хуыд кæмæн у, уыдон. Ацы курдиатджын фæсивæды сæхи цæттæ кæнын бирæ нæ бахъуыд. Мæскуыйы аивады кусджыты сæйраг хæдзары æрæмбырд бирæ адæм. Уазджыты `хсæн Ирыстоны арæнтæй кæддæр чи ракъахдзæф кодта æмæ йæ райгуырæн бæстæйæ дард чи у, уыдон. Ирон æвзаг æмæ литературæйы бæрæгбоны агъоммæ бацæттæ кодтой рæсугъд концерт. Концерт саразыны хъуыды равзæрд Дзускуаты Беллæмæ. Скрипкæйыл цæгъдынмæ дæсны у. Йæ курдиат кæй зæрдæмæ цæуы, уыдон дзы ракуырдтой, цæмæй сын аивадон фембæлд сараза. Бафæндыд сæ, ирон сфæлдыстадæй йæ царды уавæрты тыххæй иппæрд чи у, уыдоны дæр æрбахонын. Мæскуыйы цæргæйæ, йæ фæнд базонын кодта Ирыстоны аивады кусджытæн. Уыдон «дыууæ» нал загътой. Концерт саразыныл иумæ бакуыстой. Афтæмæй сфæлдыстадон изæры сценæмæ ракъахдзæф кодтой Хадыхъаты Аланæ, Царахаты Батрадз, Абайты Зæлинæ, Хуыгаты Батрадз, Дзускуаты Таймураз, Хъуысаты Сослан æмæ æндæртæ. Концертон программæ уыд цымыдисаг. Ирон зарджытæ, фæндыры рæсугъд зæлтæ, доулийы цагъд, ирон кафт æмæ рæсугъд æмдзæвгæты рæнхъытæ. Бæрæгбон саразын сын кæй бантысты, ууыл дызæрдыг æппындæр ничи кæны. Концерты архайджыты æмæ йæ саразджыты ныхæстæм гæсгæ ахæм аивадон бæрæгбæттæ араздзысты арæхдæр. Гæнæн ис, æмæ ма гастрольты дæр ацæудзысты нæ бæстæйы алы горæттæм. Æгæрон паддзахады ирон адæм бирæ рæтты цæрынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv