Сæрмагонд æфсæддон операцийы архайджытæн уыдзæн уæлдæр ахуыргæнæндæттæм хицæн квотæмæ гæсгæ бацæуыны фадат. Бæстæйы вице-премьер Татьяна Голиковайы ныхæстæм гæсгæ, ныртӕккӕ коммерцион æгъдауæй чи ахуыр кæны, уыдоны та раивдзысты бюджетон ахуырадмæ. Вице-премьер фæнысан кодта, сæрмагонд æфсæддон операцийы архайджытæн ма сæ бон кæй у лæвар райсын цæттæгæнæн хайады ахуырад дæр. Раздæр ма Уæрæсейы ахуырад æмæ наукæйы министрад бауынаффæ кодта, уæлдæр ахуыргæнæндæттæн сæ студенттæй æфсæддон операцийы чи архайы, уыдонæн ӕмӕ сæ бинонтæн материалон æххуыс бакæнын, стæй, сæ ахуырæн цы фæрæзтæ фидынц, уыдон фæкъаддæр кæнын. Фарон та президент Владимир Путин сфидар кодта закъон, сæрмагонд æфсæддон операцийы архайджыты сывæллæттæн бар кæй ис уæлдæр ахуыргæнæндæтты квотæмæ гæсгæ ахуыр кæнынæн. Ахæм льготæтæ лæвæрд цæуы, Уæрæсейы хъæбатырты ном чи хæссы, стæй Лæгдзинады 3 орденæй хорзæхгонд чи æрцыд, уыдоны сывæллæттæн дæр. Бакалавриаты æмæ специалитеты программæтæм гæсгæ ахуыр кæндзысты бæджеты фæрæзты хардзæй. Исдзысты сæ, уæлдæр ахуыргæнæндон алы аз дæр цы квотæ снысан кæна, уымæ гæсгæ.