Тедеты Руслан фембæлд республикæйы журналисттимæ

Парчы цы бирæуæладзыгон хæдзар фехæлдтой, уый фарсмæ коммерцион бæстыхæйттæ дæр айсдзысты. Объекттæ тæссаг сты адæмы æдасдзинадæн. Уый тыххæй ныхас цыд республикæйы паддзахадон исбон æмæ зæххы ахастыты министр Тедеты Русланы пресс-конференцийы. Бæстыхæйтты хицæуттимæ ныридæгæн фембæлыдысты. Семæ ныхас кæнынц. Министры ныхæстæм гæсгæ, уыцы бынаты хъуамæ уа сывæллæты аив цад. Уымæй уæлдай ма æрдзырдтой бирæсывæллонджын бинонтæн зæххы хæйттæ дæттыны тыххæй дæр. 210 зæххы хайы радих кодтой Дзуарыхъæуы. 44 гектары зæхх та радтой Джызæлы. Ам зæххы гæппæлтæ æрхаудзæн 497 бинонтæм. Уый руаджы программæ æнæхъæнæй æххæстгонд æрцæудзæн. Республикæйы парламенты хæстæгдæр æмбырды æркæсдзысты зæххытæ уарыны бартæ кæмæ хаудзысты, уыцы фарстамæ. Ног закъонмæ гæсгæ уый уыдзæн республикон хицауады бæрны. Ахæм ивддзинæдты руаджы зæххытæй сæ нысанмæ гæсгæ пайда кæныны уавæр хъуамæ сраст уа. Ацы лыггæнинаг фарстамæ æркæсын сын бабар кодта Сергей Меняйло. Ныхас цæуы хъæууонхæдзарадон зæххыты тыххæй. Уыдон та сты 353 мин гектары. Фидæны фæнд кæнынц æппæт зæххыты реестр дæр скæнын.