Цæгат Ирыстоны аивæдты колледжы ахуырдзаутæ сæхи бæстонæй цæттæ кæнынц конкурсмæ

Цæгат Ирыстоны аивæдты колледжы ахуырдзаутæ сæхи бæстонæй цæттæ кæнынц конкурсмæ - цыбыр рæстæджы фæстæ дзы æвзæрст æрцæудзысты радон мадзалы уæлахиздзаутæ. «Молодость Осетии» - афтæ хуыйны, ныр цалдæр азы дæргъы цы конкурс цæуы, уый. Йæ аразджытæ сты нæ республикæйы фæсивæды хъуыддæгты комитет, Цæгат Ирыстоны культурæйы министрад æмæ Гергиты Валерийы номыл аивæдты колледж. Уыдон æрвылаз аразынц ахæм æркастытæ. Ныр дæр та аивæдты колледж радон хатт цæттæ кæны цымыдисаг мадзал. Хъуамæ 2-æм æмæ 3-æм декабры æвзæрст æрцæуой конкурс «Молодость Осетии»-йы уæлахиздзаутæ. Къæридорты адæмæй ахизæн нæй. Иууылдæр сты цавæрдæр куыстыл хæст. Мæнæ ацы бынаты цæгъдынц фæндырæй, гыццыл фалдæр та гитарæ æмæ балайкæйæ. Иу ныхасæй - цæуынц репетицитæ. Тагъд рæстæджы хъуамæ сæхи равдисой конкурс «Молодость Осетии»-йы. Абойты Хетаг нын куыд радзырдта, афтæмæй уый йæхæдæг дæр йæ аивадон къорд «Алания»-имæ фарон бацархайдта ацы цымыдисаг конкурсы. Йæ къорды архайджытæ сæхи бæстонæй бацæттæ кодтой. Уымæ гæсгæ нæ республикæйы райстой фыццаг бынат. Конкурс «Молодость Осетии»-йы уагæвæрдмæ гæсгæ, уæлахиздзаутæ хъуамæ ацæуой Æппæтуæрæсеон Дельфиаг хъæзтытæм. Уыцы хъæзтытæ æрвылаз дæр дисы ’фтауынц адæмы, уымæн æмæ дзы кæдæриддæр вæййы бирæ архайджытæ. Не 'мзæххонтæ дзы уæд бацахстой æртыккаг бынат. Уый æмбаргæйæ азæй азмæ архайджыты фæлтæрддзинад кæны уæлдæр. Аивæдты колледжы директор Мурасты Изабеллæ куыд бафиппайдта, афтæмæй ацы конкурстæ стыр ахъаз сты рæзгæ фæлтæрæн. Уæлдайдæр та аивады бæрзæндтæм схизын кæй фæнды, уыдонæн. Мурасты Изабеллæ ма нын куыд бамбарын кодта, афтæмæй ацы аз конкурсы бацархайдзысты фугæнгæ инструменттæй чи цæгъды, ахæмтæ дæр. Уыцы ног домæнтæ Гергиты Валерийы номыл аивæдты колледжы бахастой æрæджы, 2019 азы. Уыимæ ма ацы конкурсы æрмæст аивæдты колледжы ахуыргæнинæгтæ нæ архайынц, фæлæ ма нæ республикæйы скъолаты ахуырдзаутæ дæр. Уæвгæ, дæнцæг кæмæй хæссой уый сын ис. Зæгъæм, 4 курсы ахуыргæнинаг Гуыриаты Руслан ацы конкурсы архайдзæн фыццаг хатт. Мурасты Изабелæ куыд бафиппайдта, афтæмæй колледжы студенттæн ныртæккæ ис алы уавæртæ дæр, цæмæй сæ дæсныйады гæнæнтæй пайда кæной. Ныры онг колледжы ис æппæт инструменттæ дæр. Уыцы æнтыстдзинад разамындæн сæ къухты бафтыд Цæгат Ирыстоны Паддзахадон филармони, уыимæ ма нæ республикæйы оперæ æмæ балеты театр Мариинаг театры филиал куы ссисты, уæд. Уый хорзы 'рдæм сахадыдта нæ горæты оркестртыл. Ныр аивæдты колледж ифтонггонд у æппæт инструменттæй дæр. Къутæрты Аидæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv