Мысыны бон

Дзæуджыхъæуы æрæмысыдысты сомихæгты геноциды амæттæгты. Цæгат Ирыстоны сæдæгай адæймæгтæ æрбацыдысты сæ номыл аргъуыдмæ. Æрхъуыды кодтой чи нал ис, уыдоны нæмттæ, дидинджытæ сæвæрдтой ХачкАрыл - сомихаг дзуары нывимæ дурæй арæзт къæйыл. Хуыцаубоны скъолайы ахуырдзаутæ бакастысты æмдзæвгæтæ, сомихаг æхсæнады уæнгтæ та радзырдтой уыцы зын азты тыххæй. Сомихаг апостолы номыл аргъуаны сæргълæууæг Тер-Геворг 103 хатты дзæнгæрæг ныццагъта. Геноциды бонæй уал азы рацыд. Уæ зæрдыл уын æрлæууын кæндзыстæм, 1915-æм азы раздæры Осмайнаг импери æмæ Турчы республикæйы зæххытыл сфæнд кодтой æнæхъæн наци ныппырх кæнын. Геноциды рæстæг амардтой милуан сомихагæй фылдæр. Уыцы цау нымад у фыццаг геноцидыл. Аргъуаны мадзалы фæстæ равдисдзысты 1915-æм азы цауты тыххæй документалон киноныв. «Мах алы аз дæр бацæттæ кæнæм æмæ æрбацæуæм ацы мадзалмæ нæ хиуæттимæ. Мæ ныййарджытæ дæр ам сты, мæ бинойнаг æмæ нæ сывæллон дæр. Мах стыр аргъ кæнæм ацы бонæн. Æрвылаз дæр æрбамбырд вæййæм ацы ран, æрбахæссæм дидинджытæ, æрымысæм нæ адæмы истори, цæмæй иумæ уæм æмæ ма рох кæнæм, 1915-æм азы цы æрцыд, уый», - сомихæгты æхмæнады уæнг Вардан Ванян. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv