Мария Ковалева рацыд ирон æвзагæй олимпиадæйы республикон къæпхæнмæ

Ирон æвзагæй олимпиадæйы республикон къæпхæн райдыдта Цæгат Ирыстоны. Архайынц дзы Дзæуджыхъæуы æмæ районты скъолаты 9 æмæ 11-æм кълæсты ахуырдзаутæ, муниципалон къæпхæны йæхи хорз чи равдыста, уыдон. Се 'хсæн исАрхонкæйы фыццæгæм скъолайы ахуыргæнинаг Мария Ковалёвæ дæр. Мария Ковалевайан ирон æвзаг мадæлонау адджын у йæ сабибонтæй. Райдиан кълæстæй йæ зæрдæргъæвдæй ахуыр кæны. Бирæ уарзы ирон уацмыстæ æмæ æмдзæвгæтæ. Уæлдай хæстæгдæр йæ зæрдæйæн сты Хетæгкаты Къостайы æмдзæвгæтæ. Марияйы канд ирон æвзаг не'лвасы йæхимæ. Тынг æнувыд у ирон традицитæ æмæ культурæйыл дæр. Æппынæдзух архайы йæ зонындзинæдтæ фæфылдæр кæныныл. Арæх йæ сæрæндзинад ирон æвзагмæ Мария февдисы скъолайы алыхуызон конкурстæ æмæ равдыстыты. 7-æм къласæй та райдыдта ирон æвзаджы олимпиадæйы йæ зонындзинæдтæ фæлварын. Алы хатт дæр уыди хуыздæрты 'хсæн. Ныртæккæ Мария ахуыр кæны 10-æм къласы. Ацы аз ын бантыст олимпиадæйы муниципалон къæпхæны фæуæлахиз уын. Мария хауы, ирон æвзагыл чи нæ дзуры, уыцы къордмæ. Уымæ гæсгæ йын йе ’нтыстдзинæдтæ уæлдай æхсызгон сты. Чызгæн ирон æвзаг йæ сабибонтæй бауарзын кодта йæ ахуыргæнæг Гæззаты Татьяна. Æппынæдзух æй разæнгард кодта. Олимпиадæмæ бацæттæ кæнынмæ дæр йын уый баххуыс кæны. Йемæ бакусы урокты, стæй ма фæсурокты дæр. Ныр та цæттæ кæнынц олимпиадæйы республикон къæпхæнмæ. Татьянæйы фидарæй уырны, Мария уым дæр æнтыстджынæй кæй бацархайдзæн, уый. Декабры ахицæн олимпиадæйы муниципалон къæпхæн. Архайдтой дзы мин скъоладзауæй фылдæр. Хуыздæртæ сæ зонындзинæдтæ равдисдзысты 25-26 февралы республикон къæпхæны. Олимпиадæйы республикон къæпхæны уæлаахиздзауты схорзæхджын кæндзысты ирон æвзаджы бæрæгбоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv