Граффитийы армдæсныйад

Граффити, кæнæ уынджы аивад кæй хонынц уый Дзæуджыхъæуы уынгты сарæх. Фæлæ фæлдыстадон куыст кæнгæйæ, армдæсныты хъæуы уагæвæрд сæххæст кæнын. Ныв хъуамæ вандализмыл нымад ма `рцæуа. Стрит-арт чи уарзы, уыдон хъуамæ æххæст кæной сæрмагонд домæнтæ. Цавæртæ, уый базондзыстут нæ дарддæры æрмæджы. Мамсыраты Хаджумары портрет йæ ном цы уынг хæссы, уым йæ хуыз скалдта. Рæзгæ фæлтæрæн йæ сурæт у дæнцæджы хуызæн. Национ хъайтары ныв ам цалдæр мæйы размæ фæзынд. Скодтой йæ армдæсныты æрмадз - «Порталы» нывгæнджытæ. Семæ æмзонд чи у, уыдон дæр сæм фæкастысты. Бæстыхайы къултæ æмæ быру саив кодтой патриотон символикæйæ. Сæ куыстæн та сын аргъ скодтой Дзæуджыхъæуы цæрджытæ. Гуля Курбанова: «Мæнмæ гæсгæ граффити хъуамæ уа цымыдисаг, хъæлдзæг кæнæ æндæр исты хъуыды æмæ мидис хæсса». Заур Каджаев: «Граффитийы аивадæй адæймаджы зæрдæ райы. Къулæн йæ хуыз аив куы нæ уа, уæд дзы фæлтау граффити уæд». Фæстаг азты стрит-артæй чи архайы, уыцы нывгæнджытæн Дзæуджыхъæу хорз фæзуат сси. национ символикæимæирд æмæ зæрдæмæдзæугæ куыстытæ горæты уынгты арæх фенæн ис. Курдиатджын адæмæн дзы стыр авналæнтæ ис. Фæсивæды хъæппæрис хорз у, фæлæ кæсын хъæуы нывгæнджыты сфæлдыстадмæ дæр-зæгъынц Дзæуджыхъæуы бынæттон администрацийы. Ныв кæнынæн ис сæрмагонд домæнтæ æмæ сæ хъæуы æххæст кæнын. Фыццаджыдæр ныффысын курдиат горæты администрацимæ. Уыцы гæххæттимæ бадæттын эскиз. Хъуамæ закъон ма хала - экстремизм æмæ дзы рекламæ куыд нæ уа, афтæ. Æмæ кæд æппæт домæнтæн дæр дзуапп дæтты, уæд авторы уарзон куыст фæзындзæн горæты уынгтæй иуы. Йæ ахорæнтæй горæты уынгтæ барæсугъд кæнын кæй фæнды, уыдон иу æмæ дыууæ не сты, зæгъынц специалисттæ. Мадина Дзиова, Дзæуджыхъæуы арæзтад æмæ архитектурæйы управленийы, рекламæйы хайады разамонæг: «Нывгæнджыты æрбахонæм æмæ семæ бæстонæй фæныхас кæнæм. Бамбарын сын кæнæм - бирæфатерон хæдзары цæрджытæ нывимæ хъуамæ, æнæмæнг, сразы уой. закъон куыд амоны, афтæ. Бузныг мæ зæгъын фæнды хъæппæрисджын фæсивæдæн, сæ истори чи нæ рох кæны æмæ йæ гаффитийы хуызы адæмы размæ чи хæссы, уыдонæн». Аивадимæ баст фæлгонцтимæ æмрæнхъ арæх бырутыл фæзынынц æнæмбæлгæ фыстытæ дæр. Уый та хорз æвдисæн нæу. Знаггадгæнджытимæ тох кæнынц Рахизфарсы районы префектурæйы кусджытæ. Хæстæгдæр рæстæг специалисттæ фæнд кæнынц Терчы былгæрон цалцæггæнæн куыстытæ скæнын. Сахордзысты æнаккаг фыстытæ дæр . Стрит-арты хуызы чи ныв кæны, уыдонæн та администрацийы зæрдæ бавæрдтой дарддæр дæр сæ размæ цæлхдуртæ кæй нæ æвæрдзысты, уымæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv