Дзæуджыхъæуы аивæдты лицейы сценæйыл равдыстой фыццаг ирон балет сывæллæттæн

«Ацæмæзы уадзындз» — сывæллæтты фыццаг ирон балет национ æууæлтимæ. Фенæн æй уыд Дзæуджыхъæуы аивæдты лицейы. Сценæйыл 60 артистæй фылдæр. Балетмæ музыкæ ныффыста композитор Макоты Ацæмæз. Алæмæты рæсугъд костюмтæ, сценæйы ирд фæлыст тетрадзауты рæсугъд æмæ æхсызгон æнкъарæнтыл æфтыдтой. Цæмæй ма сцымыдис кодтой аивадуарзджыты? Ацæмæз æмæ Агуындæйы уарзондзинады истори сценæйыл ирдæй æвдыст. Нарты гуыппырсар Ацæмæз йæ алæмæты уадындзыл цæгъдын куы райдайы, уæд ын йæ зæлтæм дидинджытæ дæр райхæлынц. Уыдоны ролы — лицейы хореографион хайады хъомылгæнинæгтæ. «Ацæмæзы уадындз» — сывæллæтты фыццаг ирон балет. Ног цалцæггонд сценæйыл 60 артистæй фылдæр. Лицейы рауагъдонтæ — зындгонд кафджытæ, уыимæ ма аивады фыццаг къздзæфтæ чи кæны, уыдон. Æрыгон, фæлæ курдиатджын фæсивæд. Зæгъын хъæуы уый æмæ балетмæ музыкæ ныффыста Уæрæсейы аивæдты сгуыхт архайæг Макоты Ацæмæз. Ацы аивады фæзынды баиу сты драматурги, музыкæ æмæ кафт. Ирон адæмы музыкалон хъæздыгдзинады азæлд иу баиу арвнæрдимæ, сыфтæры сыбар-сыбур æмæ хæххон цъиуты зардимæ. Уæвгæ балеты æрдзурæн ис алыхуызон темæтыл — уарзондзинад, уæздандзинад æмæ сæрибардзинадыл. «Ацæмæзы уадындз»-ыл композитор хуымæтæджы нæ бакуыста, уæдæ сывæллæтты æгæрон уарзтæй кæй уарзы æмæ йын сæ цард сæрмагонд бынаты кæй ис, фыст дæр сын уый тыххæй æрцыд. Алæмæты рæсугъд уæлæдарæс, сценæйы ирд фæлыст, æппæт уыцы мадзæлтты фæрцы театрдзаутæ раст цыма Номдзыд Нарты бæстæмæ ахæссынц, афтæ фæкаст. Уæвгæ, ацы хъуыддагыл мадзал аразджытæ æвæрынц стыр хъомылодон хæстæ, ахæм хуызы архайынц фæсивæды зæрдæты аивадмæ æмæ национ традицитæм уарзондзинад раргом кæнын. Валерия Козаева _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv