Æдасдзинад кæмæй арæзгæ у?

Специалисттæ сбæрæг кодтой Дзæуджыхъæуккаг паркты æмæ фæлладуадзæн фæзты алыхуызон херыгæнæнты уавæр. Ирхæфсæн аттракционтæм йæ цæст чи дары æмæ куыд хъахъхъæнынц адæмы æдасдзинад, уый тыххæй радзурдзысты нæ уацхæсджытæ. 60 аттракционы, сæдæгай механизмы æмæ иу сезонмæ мин æрбацæуæгæй фылдæр. Алы бон дæр ныййарджытæ сæ сывæллæтты æрбакæнынц парктæм æмæ фæлладуадзæн фæфзтæм. Вæййы афтæ æмæ хæстæгдæр хæдзæртты сывæллæттæ сæхæдæг дæр æрбацæуынц. Уымæ гæсгæ, сæвзæры фарста – хиирхæфсгæйæ кæстæртæ æдас сты, æви нæ? Фæстаг азты фыдьбылызтæ кæй сарæх сты, уый зонгæйæ, ацы фарстамæ уæлдай цæст дарын хъæуы.  Аттракционтæм цæстдарджытæ дæр лæмбынæг æмæ бæстон уымæн кусынц. Краснодары аттракционты æдасдзинады центры кусæг Илья Трифонов: «Мах скæнæм техникон уавæры тыххæй акттæ. Уыдонмæ гæсгæ, парчы цы къуылымпыдзинæдтæ рабæрæг кодтам, уыдон хъуамæ бынæттон кусджытæ аиуварс кæной. Æмтгæй райсгæйæ, Дзæуджыхъæуы аттракционты уавæр у хорз». Парчы хицауад æмбарын кæны, æдасдзинады центры специалистты сæхæдæг æрбахуыдтой. Фæнды сæ базонын, аттракционтæ цы хъуаг сты, æмæ сæм рагагъоммæ базилын, цæмæй фыдбылызтæм ма расайой, уый тыххæй. Сывæллæтты парчы æххæстгæнæг директор Будтуты Руслан: «Мах Питерæй æмæ Краснодарæй æрбахонæм специалистты. Уыдон ссæуынц, æркæсынц æмæ сбæрæг кæнынц алы аттракционы уавæр дæр. Кæд дзы исты хъæндзинæдтæ рабæрæг кæнынц, уæд сæ гæххæттыты æрфыссынц. Бамбарын кæнынц куыд хуыздæр сыл бакусæн ис. уый. Уыцы хъæндзинæдтæ мах сраст кæнæм, цæмæй херытæ нæ уазджытæн æдас уой». Раст зæгъгæйæ, атракционтимæ сæвзæрд цымыдисаг уавæр: ацы фарстамæ паддзахад йæ цæст дары, зæгъгæ, уый кой дзы, уæвгæ дæр нæй. Бартæ ииуылдæр сты амалхъом адæмы къухы. Цæсгом кæуыл ис, уыдон æркæсынц сæ атракционты уавæрмæ, базилынц сæм. Адæмы цардмæ куыд фæндыйы цæстæй чи кæсы, уыдоны та æрмæст се фтиæгты мæт ис. Экспертты хатдзæгтæ фылдæр хатт гæххæттыл фыстæй баззайынц. Бахъæуынц сæ, æрмæст исты фыдбылыз куы рцæуа, уæд. Æндæр сæ ирхæфсæн техникæ æдасдзинады домæнтæн дзуапп дæтты æви нæ, уымæ кæсгæ дæр не `ркæнынц. Гæхæттытæ ма сæм ис, уый сæ зæрдыл æрыфты, амалхъом адæймаг йæ аттракционтæ муниципалон зæххыл æрæвæрын куы сфæнд кæна, уæд. Муниципалон куыстуат «Радуга»-йы сæйраг директоры хæдивæг Чертхъойты Гурам: «Ацы гæххæттыты фыст ис æрмæст аттракционты цæттæдзинады тыххæй нæ, фæлæ ма чи æрбацæуы, уыцы адæмы æдасдзинадæн дзуапп кæй дæттæм, уый тыххæй дæр. Æппæт гæххæттытæм æмæ аттракционты уавæрмæ гæсгæ, администрацийы рахæссынц уынаффæ». Фæлæ уæддæр æнæ æркастæй хъуыддаг нæ ахицæн уыдзæн. Ногарæзт аттракционты бахъæудзæн сертификаци ацæуын æмæ æрвылаз техникон æркаст цæуын, стæй цæттæдзинады гæххæттытæ исын. Ахæм домæнтæ фыст сты техникон регламенты. Йæ тыхы бацæудзæн ацы азы 18-æм апрелы. Экспертты ныхæстæм гæсгæ, ацы мадзæлтты фæстиуджытæ фенæн уыдзæн æрмæст 5 азы фæстæ. Фæлæ ма ис фиппаинаг. Атракционты техникон хорз куы уа, уæддæр ма адæм хъуамæ сæхи куыд æмбæлы, афтæ дарой. Æмæ сæхæдæг дæр хъуыды кæной æдасдзинады домæнтæ. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv