Æрыгон Пифагортæ

Математикæ чи уарзы, уыцы сывæллæттæн Битарты Вячеславы уынаффæмæ гæсгæ байгом кæндзысты сæрмагонд кълæстæ. Ахуырадон программæйы домæнтæм гæсгæ, дзы физикæ æмæ математикæйы предметтæй фылдæр уроктæ уыдзæн. Ныртæккæ уал районты æвзарынц ацы зонадтæм æмхиц сывæллæтты. Хуыздæртæн уыдзæн Дзæуджыхъæуы математикон интернаты ахуыр кæныны фадат. Цæргæ дæр уым кæндзысты. Ныридæгæн сын æмдзæрæн сарæзтой. Бæлвырддæр хабæрттæ радзурдзæн нæ уацхæссæг. Света Саркисовæйы куы бафæрсынц «Фидæны дæ кæмæй суæвын фæнды, цæвæр дæсныйадыл хæст», уæд ын дзуапп радтын нырма зынгомау вæййы. Худгæйæ фæзæгъы, бирæ рæстæг ма йын кæй ис. Фæлæ йæ фидарæй зоны - йæ цард æй фæнды математикæимæ сбæттын. Ацы наукæмæ йе ргом `аздæхта. Ныртæккæ Светæ ис, ахуырад æмæ наукæйы министрад фæлварæны хуызы цы къордтæ байгом кодтой, уыдонæй иуы. Света Саркисовæ: «Мæнмæ гæсгæ , математикæ логикæ æмæ хъуыдыкæнынад хуыздæр кæны. Алы дæсныйады дæр хъæуы математикæ. Тынг хъæугæ предмет у. Мæхæдæг та уарзын алыхуызон комбинацитæ аразын». Нæ республикæйы сæргълæууæг Битарты Вячеславы хъæппæрисæй «Цæгат Ирыстоны математикон ахуырады рæзт»-ы проект æххæст кæнын майы райдыдтой. Йæ сæйраг нысан у- курдиатджын сывæллæтты рабæрæг кæнын æмæ сын сæрмагонд математикон кълæсты ахуыр кæныны фадат радтын. Ацы аз физикон-математикон лицей-интернаты 7 къласы байгом кодтой. Ам сывæллæттæ бæстондæрæй ахуыр кæндзысты наукæты паддзахы бындуртæ. Мæргъиты Нелли- «РЦИ-Аланийы математикон ахуырады рæзт»-ы проекты разамонæг:«Ахуыр кæндзысты математикæ, физикæ æмæ информатикæ бындуронæй. Ацы предметтæн фылдæр сахаттæ уыдзæн. Сывæллæттæн байуардзысты сæрмагонд чингуытæ дæр. Боны дыккаг æмбисы та скъоладзаутæн уыцы предметтæй уæлæмхасæн ахуыртæ уыдзæн. Уыимæ ма лицей-интернаты кусдзæн кванториум. Кæстæртæ дзы сæхи фæлвардзысты иртасæн куысты æмæ проекттæ аразыны». Лицейы ахуыргæнинæгтæ цæргæ дæр ам кæндзысты. Æрыгон математиктæн бацæттæ кодтой хицæн бæстыхай. Æппæт уавæртæ дæр сын цæттæ сты. Ныййарджытæн сæ сывæллæтты феныны фадат уыдзæн цыфæнды бон дæр. Улæфæн бонты та сæ-иу хæдзарма акæндзысты. Ныййарджытæн сæм сæ зæрдæ не `хсайы. Интернаты сын хорз уыдзæн. Сергей Цыганков: «Раст зæгъгæйæ, ахæм фадат царды иу хатт вæййы.Сывæллæттæн дзы, æцæгæйдæр, хорз уавæртæ ис. Сæ цæст сæм дардзысты хистæртæ. Физикæ, математикæ та кæд зын предметтæ сты, уæддæр - хъæугæ. Ныртæккæ сывæллæттæн хъæуы бындурон зонындзинæдтæ раттын». Ацы къласы 20 сывæллоны ахуыр кæндзæн. Проект кæд НЫРМА фæлварæны хуызы конд у, уæддæр ахуыргæнджыты, сывæллæтты, цæстдарджыты æмæ хъомылгæнджыты фæнд иу у - ноджыдæр ма иу кълас байгом кæнын. Математикæ ахуыр кæнын кæй фæнды, ахæм сывæлæттæ кæндзысты фылдæр. Дызæрдыг ыл ничи кæны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv