Хæрзхъæд продукт

Цæгат Ирыстоны амалхъом адæмæн баххуыс кæнын республикæйы хицауад нымайы йæ сæйраг хæстæй иуыл. Уыцы нысантæн æрвылаз радих кæнынц æхцайы фæрæзтæ дæр. Субсиди райсынæн æнæмæнг домæн у куысты бынæттæ саразыны хæс. Уый сæххæст кæнгæйæ, проекттæ бантысы царды рауадзын. Фыццаг къахдзæфты хорз бæрæггæнæнтæ чи равдыста, уыцы куыстуаты къæсæрæй бакаст нæ уацхæссæг дæр. Хæрзхъæд стуры фыд равзарынц, йæ сойтæ йын айсынц, лыстæг æй æрлыгтæ кæнынц, уый фæстæ дзидзайыл хъацæнтæ ныккæнынц æмæ йæ хус кæнын райдайынц. Æртæ боны фæстæ снэк кæй хонынц, уый ацæттæ вæййы. Хус æй æртæ хатты фæкæнынц, бафтауынц æм нуры, кæрдæджытæ - дзидзайы хæрздæф чи фæнысан кæны, ахæм хъацæнтæ. Батухынц æй, уæлдæф æм кæй руаджы нæ хæццæ кæны, ахæм дзæкъулы. Бирæ нæу, фæлæ дзидза вæййы хæрзад. Хæзхъæддзинад цы химион буаргъæдтæ сафынц, уыдонæй хойраг хъуамæ цух уа — афтæ нымайы куыстуаты сæйраг технолог Гæлуты Алинæ. Уый у сæйраг домæн. Амалхъом адæм хи куыстуат байгом кодтой, Дзæуджыхъæуы базарты тæрхæджытыл куы æрзылдысты, уæд. Хи цæстæй йæ федтой, хуызæн продукци дзы бирæ нæй. Бацархайдтой æмæ базмæлыдысты. Æппæт хъæугæ документтæ сæмбырд кодтой æмæ дысвæлдæхтæй бавнæлдтой. Дзгойты Зауыр — сæ иу. Ныртæккæ экопродукт дзуапп дæтты æппæт домæнтæн. Фæсарæйнаг компанитимæ ерыс кæнын зын у, фæлæ ног арæзт куыстуатæн æнтысы. Паддзахад куыстуаты разамындмæ æнæрвæссонæй нæ ракаст. Сæ къух сын гранты хуызы ацарæзта. Уый сын ахадгæ æххуыс фæцис. Афтæмæй æрыгон амалхъом адæм сфæнд кодтой сæ продукцийы хуызтæ фæфылдæр кæнын. Республикæйы экономикæйы райрæзты министрады ахæм хъæппæрисджын фæсивæдмæ дарынц сæрмагонд цæстæнгас. Цæттæ сты дарддæр дæр æххуыс кæнынмæ. Фæсивæдмæ ис алы адæмыхæттыты национ рецепттæ баиу кæныны хъуыды дæр. Уырны сæ, паддзахады æххуысимæ æмæ, сæ куыстмæ дарддæр дæр æнувыд цæстæй куы кæсой, уæд сæ къухы бафтдзæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv