Куыд æппæт Уæрæсейы, афтæ нæ республикæйы скъолаты рауагъдонтæ дæр абон радтой иумæйаг паддзахадон фæлварæн. Сæ зонындзинæдтæ сбæрæг кодтой 2 минмæ ввахс адæймаджы. Фæлварæн раттынмæ бацæттæ кодтой 11 пункты. Се ‘ппæт дæр ифтонггонд уыдысты видеоцæстдарды системæтæ æмæ экзаменæн хъæугæ æрмæджытæй. Фæлварæны цыдмæ сæ хъус дардтой федералон эксперттæ, республикæйы ахуырад æмæ наукæйы министрады кусджытæ. Афтӕ райдыдта абон рауагъдонтӕн сӕ райсом. Фæлварæны райдианмæ мæ баззад сахаты 'рдæг. Рауагъдонтæ фæлхат кæнынц æрмæг. Семæ бахастой паспорт, ручкæ æмæ адджинаг. Тыхсынц, фæлæ сæ зонындзинæдтыл дызæрдыг нæ кæнынц. Сæхи цæттæ кодтой цалдæргай азтæ. Айдарты Давид фæнд кæны юридикон факультетмæ бацæуын. Иннӕ предметтӕ радта, ацы фæлварæн фæстаг у. Æрыгон адæм куыд зæгъынц, афтæмæй сын сæхи скъолаты фæлварæн раттын æнцодæр уыдаид. Фæлæ домæнтæ æххæст кæнын хъæуы. Æрмæст иу аудиторийы се 'мкъласонтимæ куы бахауынц, уæд сын уый дæр ныфс дæтты. Иу домæн ма - бахизæны басгæрст ацæуын. Сывæллæттæй къаддæр нæ тыхсынц сæ ныййарджытæ æмæ ахуыргæнджытæ. Сæумæрайсомæй фæстæмæ сты скъола-интернаты раз. Дæттынц фæстаг амынддзинæдтæ, ныфс æвæрынц рауагъдонтæн. Цæстдарджытæ сæ куыст кæнынц рæстдзинады бындурыл. Архайынц, цæмæй фæлварæн ацæуа, домæнтæм гæсгæ. Ахуырад æмæ наукæйы министрады статистикæйы бæрæггæнæтæм гæсгæ, æхсæнадзонынад æппæты егъаудæр предмет у. Республикæйы йæ дæттынц 2 мин адæймагмæ ввахс. 17 сæрмагонд пунктæй кусы 11. Ацы скъолайы фæткхæлдтытæ нысангонд не 'рцыд. Сæ фылдæрæн æхсæнадзонынад фæстаг фæлварæн у. Чидæртæ сæрибар уыдзысты 20-æм июны, уый фæстæ та уæлæмхасæн бонтæ. Кæд ныртæккæ рауагъдонтæн тыхст рæстæг у, уæддæр сæм дарддæр æнхъæлмæ кæсы ирд æмæ хъæлдзæг бæрæгбон.